12-пи августдиъ Мягьячгъалайиъ дуствалин Хулаъ Урусатдин Федерацияйиъ 2025-пи йисазкьан экстремизмдиз аьксивал улупбан цIийи алапIнайи Стратегия кьабул апIбаз бахш дапIнайи совещание кIули гъубшну.

 

Серенжемдиъ РД-йин милли политикайин ва диндин ляхнарин министр Энрик Муслимов, Дагъустан Республикайин Жямяаьтлугъ палатайин председатель Аьбдулмумин Ибрагьимов, РД-йин Халкьдин Собраниейин депутат Зумруд Бучаева, «Дагъустандин дишагьлийирин Союз» жямяаьтлугъ тешкилатдин председатель Интизар Мамутаева ва теклиф дапIнайи хялар иштирак гъахьну.
Серенжем ачмиш апIури, Энрик Муслимовди къайд гъапIганси, Дагъустандин дишагьлийирин Союзди аргъаж шулайи наслар тербияламиш апIбак, экстремизмдиз аьксиди ляхин гъабхбан аьхю пай кивра.

Дагъустандин дишагьлийирин Союзди пандемияйин вахтна ватандаш жавабдарвал улупу ва жвуван ватанагьлийириз кюмек гъапIу дишагьлийириз грамотйир тувну, гьадму гьисабнаъди Хив райондин дишагьлийирин союздин отделин кIулиъ айи Зумрия Сейидягьмедовайизра. Наградйир гьацира, Ватандин Аьхю дявдиъ Гъалибвал гъадабгъну 75 йис хьпаз бахш вуди, Урусатдин дишагьлийирин Союздин «Гьюрматнан лепе» проектдин акция-йиъ гъалибвал гъадабгъдаризра тувнийи.