Дагъустан Республикайин Правительствойин къарарниинди, садпи сентябрилан башламиш дапIну, мектебдиъ классдин идара апIру мялимдин маважибдиин 5 агъзур манат иливиди. Мялимариз му жюрейин кюмек тувувал Урусатдин Федерацияйин Президент Владимир Путиндин табшуругъниинди РФ-дин мярифатнан Министерствойи тартиб гъапIну. Асас къарарнакк РД-йин Правительствойин председатель Артем Здуновди къул гъизигну.

 

Гьаму йисан думу метлебариз 25 миллиард манат федералин дакьатар харж апIиди. Гьаддихъди сабси, регионариъ мидиз улихьна мялимариз туври гъахьи пулин вари дакьатарра чан айиси туври гъузди. Пулин дакьатар гьарсаб мектебдиъ айи маважибдин фондназ аьлава вуди хътаиди.

«Ихь мектебариъ 24 агъзур мялимди классдин идара апIувалин ляхин кIули гъабхура. Му рягьят ляхин дар, гьаддиз мялимариз иливурайи пули ухьу рази апIура. Регионариъ улихьна иливнайи пулра айиси гъибтди. РД-йин образованиейин ва илимдин Министерствойи гьаму къарар тамам апIувалиин гюзчивал гъабхиди», – къайд гъапIну вице-премьер – РД-йин образованиейин ва илимдин министр Уммупазиль Уьмаровайи.

Гъийин йигъаз Дагъустандиъ классдин идара апIбан ляхин кIули гъабхурайи мялимариз иливнайи пул, мялимдин категорияйикан асиллу вуди, 1100 манатдилан 1700 манатдиина удубчIвурайи. Аьлава вуди иливурайи 5000 манат классдиъ айи баяр-шубарин кьадарнакан асиллу дарди тувди. Хъа, эгер сар мялимди кьюб классдин идара апIувалин ляхин кIули гъабхураш, дугъаз 10 000 манат иливиди.