Гьюрматлу Табасаран райондин агьалйир!
Ихь ватанагьли, Хючни гъулан агьали Нияз Гьяжиевдин жягьтлувалиинди, чан худул Расулра кюмекчиди гъадагъну, Табасаран райондиъ «Марци Рубас» кIуру акция тешкил дапIна. Му акция, 3 ччвур (#МарцциРубас, #чистаярека, #челленджМарцциРубас) тувну, челленж жюрейиинди кIули гъабхура.
Нияз Гьяжиевди «Табасарандин нурар» газатдиз туву мялуматариинди, му акция тешкил апIбан ва гъабхбан асас метлеб – вари Табасаран райондиъ, хъа асас вуди Рубас нир’ин али чиркшин марцц апIувал ву.
«Саб Хючна гъулаз дуфну ваъ, чпин багхьан тина Рубас нир гъябгъюрайи гъулариъ айидарихьан варидарихьан акцияйиъ иштирак хьуз шулу. Гьамци ляхин апIбиинди ухьхьан ихь хилариинди Рубас нир жюрбежюр зирзибилихьан марцц апIуз хьибди. Ккебгъдихьа Рубас нирлан, хъасин яваш-явашди ихь вари район зирзибилихьан марцц апIидихьа», — кIура Нияз Гьяжиевди.
Ав, дугъриданра, ужуб акция ву. Рубас нирхъан Нияз Гьяжиевдинси юкIв убгурайи гьарсар касдихьан, акцияйиъ иштирак духьну, Инстаграмдиъ чпин хусуси аккаунтариъ шиклар ирчну, гьамцдар хештегар дикIуз шулу:
— #Марцци_Рубас,
— #чистая_река,
-#челленджМарцциРубас