Дагъустан Республикайин гъулан мяишатдин нежбрари, чвлин мягьсуларин игнар дапIну, бегьер уч апIувал магьа аьхирихъна гъафну.
РД-йин гъулан мяишатдин ва ипIру-убхъру сурсатарин Министерствойин пресс-гъуллугънаан тувнайи мялуматариинди, ццийин йис гизаф къуруб гъабхьнушра, натижайиъ республикайин нежбрари мягьсуларин ужуб бегьер ккадабцIну.
Министерсвтойин пресс-гъуллугънаан тувнайи мялуматариинди, республикайиъ 93,8 агъзур гектар хутIлариан, саб гектариан тахилин 22 центнер бегьер ккадабцIури, 206,5 агъзур тонна чвлин мягьсулар уч гъапlну. КкадабцIу бегьернакан 50%-тIан артухъ республикайин юкьуб райондин хутIлариан уч гъапIну: Хасавюрт райондиъ – 98,7 агъзур тонна, Къарабудагъкент райондиъ – 24,5 агъзур тоннатIан артухъ, Нугъай райондиъ – 20,4 агъзур тонна, ва Къизлар райондиъ – 20,3 агъзур тоннатIан артухъ бегьер гъадабгъну. Хъа тахилин ужуб бегьер гъадабгъувалиинди, янаки гектариан гизаф центнерар уч апIувалиинди, Къизилюрт район (30 центнер), Къизлар район (26,4 центнер), Бабаюрт район (26 центнер), Казбек район (24,7 центнер), Хасавюрт район (24,5 центнер) ва Нугъай район (24 центнер) улихь хьа.
Табасаран ва Хив районарин хутIлариан мягьсулар уч апIбан гьякьнаанра мялуматар тувна.
Табасаран райондин администрацияйин гъулан мяишатдин Управлениейин начальник Аьгьмед Аваевди туву мялуматариинди, райондиъ 1 агъзурна 74 гектарин хутIлариъ чвлин мягьсулар дурзнайи. Гъийин йигъаз райондиъ, гьяжибугъда ктарди, мягьсулар дурзнайи вари хутIлариъ игнар дапIну ккудукIна.
Дяхин дубзнайи 559 гектар хутIлариан, саб гектариан 16 центнер уч апIури, 894 тоннайин бегьер гъадабгъну, хъа 52 гектариъ дурзнайи мухунна гаргрин, саб гектариан 10 центнер ккадабцIури, 52 тонна уч гъапIну, ва гьацира 20 гектарин хутIлариъ дубз-найи нюрхюн, саб гектар жилилан 10 центнер уч апIури, 20 тонна нюрх ккадабцIну. Гьяжибугъдайин гьякьнаан улхуруш, Аьгьмед Нуровичди мялум гъапIганси, райондин аьтрафариин 443 гектариъ гьяжибугъда дубзна. Гъийин йигъаз, гектарилан 40 центнер бегьер ккадабцIури, 18 гектариъ гъяжибугъда дубгна.
Хъа Хив райондиан вуйи мялуматар райондин администрацияйин жилихъди аьлакьалу месэлйириз лигру, жиларин гюзчивал гъабхру ва гьацира гъулан мяишатдин отделин кIакIначи пишекар вуйи Нариман Рамазановди тувнийи.
Дугъан гафариинди, цци райондиъ 1 агъзурна 41 гектар хутIлар дурзнайи. Гьадму кьадарнакан, саб гектариан 12 центнер тахил уч апIури, игнар гъапIу 725 гектар хутIлариан 873 тонна дяхнин бегьер ккадабцIну. Имбуну хутIлариъ, йис гизаф къуруб вуйивализ лигну, дурзнайи мягьсулар пуч гъахьну.
