Жямяаьтлугъдинна политикайн «Литературайин Табасаран» журнал 29 йисан танафусдин кьяляхъ цIийи – кIултIан табасаран чIалниинди чапдиан адабгъуз хъюгъну, сад йистIан артухъ ву. Цциб улихьнаси дидин 8-пи нумра чапдиан удубчIвнийи.
Гъийин деврин СМИ-йин ва социалин сетарин аьхю гьюлиъ ихь журнализ фициб йишв бихъураш, дидин улихь фицдар учIру месэлйир хьаш, журнализ бикIурайидар гизафси фужар вуш ва жара суалар хьади, учу «Литературайин Табасаран» журналин редактор Сефижат Кьасумовайихъди сюгьбат гъубхнийча.
– ЦIийикIултIан «Литературайин Табасаран» журнал 2019-пи йисан май-июнь вазариъ ачмиш апIуз мумкинвал гъабхьну. Журнал гьарсаб кьюб вазлик саб ражари чапдиан удубчIвура. Учу журналиъ ихь халкьдин вари шаирарин, писателарин, драматургарин эсерар чап апIуз чалишмиш шулача. Гьаддихъди сабси, ихь улихьдин деврин шаирар-классикарин юбилеяр багахь шлу вахтна, дурарин эсерарра журналин машариъ туврача. Жигьил шаирарира журналихъди сигъ аьлакьа уьбхюра, дурари чап апIуз чпин эсерар хътаура. Журналиъ поэзияйин, прозайин, драматургияйин ва жара паяр а. Пуз ккундузузки, узуз гьаму журналиъ ляхин апIуз хъюгъяйиз улихьна, гьамусдин шаирар имдру вахтна ихь литературайин кьисмат фициб шуйкIан кIури, кми-кмиди фикир гъюри шуйзуз. Хъа гьамус думу гучI’вал яваш-явашди дубгурайиз. Ухьуз бикIурайи жигьилар а. Анжагъ дурумлу рякъюъ айи ихь бажаранлу шаирари, дурарин хил дибисну, дурари бикIурайибдикан гъалатI, нукьсанвал ктабгъури, насягьят туври ккунду. Гьаци гъабхьиш, ихь литературайин артмиш’вал давам хьибди. Мисалназ, жаради улупуз ккундузуз Гюлмягьямад Расулов. Аьхиримжи вахтна думу гизафдариз таниш духьна. Думу ужуди бикIру, бажаранлу бай ву. Амир Хилибеговра зигьимлу жигьил ву. Узу гъапиганси, бикIуз ккунидар хъана а, амма дурарин эсерар сацIиб тартиб дапIну ккунду, – гъапнийи редактори.
Сефижат Кьасумовайи гьамусяаьт журнал чапдиан адабгъбаъ саб жюрейин читинвалра адруваликан къайд гъапIнийи ва, ватандашарихьна илтIикIури, дурарин теклифариз фикир тувуз учв гьарган гьязур вуйиваликан гъапнийи. Редактори гьацира журналин месэлйириз сикин дарди фикир туврайи ва дурар гьял апIуз рякъяр агурайи, подписка апIбаъ кюмек туврайи шаир Эльмира Аьшурбеговайиз, аьлимар Ширинат Жамалиевайиз ва Шарафудин Дашдемировдиз, Табасаран ва Хив районарин администрацйирин главйириз чухсагъул мялум гъапIнийи.
«Ухьу гъи ихь бабан чIалниинди чапдиан удучIвурайи газатарин ва журналарин хил дибрисиш, закурин йигъан дурарин кьисмат читинуб хьибди. Ихь гъюз-имбу наслиз гъийин девриъ чIал уьбхюрайи гавагьирар гьадрар ву. Подписка сад йисаз апIбахъан тувру кьимат аьхюб дар. Гизаф касибвал кайи касар ихь арайиъра амдар. Саб фтиз-вушра лазим дарубдиз харж апIру пул кьяняаьт дапIну, бабан чIалниинди чапдиан адагъурайи дакьатариз подписка гъапIиш, гьаддикан хизандизра, веледаризра, бабан чIал уьбхбазра артухъ мянфяаьт хьибдийи», – аьлава гъапIну Сефижат Кьасумовайи.
Учура дугъан гафарин тереф уьбхюрача.
