Ихь жигьилар чпи яшамиш шулайи йишв’ан удучIвну жара йишваз гъушиган, кми-кмиди чиб читин аьгьвалатнаъ итру, чIуру дюшюшарихъна хру жара касарин тясирнакк ккахъру. Гьаци дархьбан бадали, гъалмагъал арайиз гъюз гъитру себебарихьан, улхбар-кчIихбарихьан ярхла хьувал лазим ву.
Гьамусяаьт мектебар ккудукIнайи гизаф жигьилар Урусатдин жара регионариз урхуз, лихуз гъягъру вахт ву. Гьаддихъди аьлакьалу вуди, жара йишвариъ учв фици духну ккундуш, ихь жигьилариз кIваин апIуз ккундузуз.
Ихь уьлкейин жара шагьриз, харижи уьлкейиз гъушишра, душвариъ инсанрин арайиъ аьлакьйир уьрхбан чан къайдйир айиваликан ухьу гьархну ккундар. Дагъустан Республикайиъ кьабул дапIнайи къайдйир тамам дарапIруган, ухьузра хушди шулдархьуз.
Дагъустандиз жара йишвариан гъафидари, саризра манигъ’вал дарапIди, ерли аьдатарик тягьна ктрипди, чпиз рягьятвал гъадабгъну кьяляхъ гъягъюз мумкинвалар агуру. Республикайин аьхюну пай агьалйир дуфнайи хялар ужуди кьабул апIуз, чпикан тина хялар рази апIуз гьарган гьязур ву. Жара йисариси дарди, цци Дагъустандиз гьюлин гъирагъдихъ рягьятвал гъадабгъуз дуфнайи касарин кьадарра аьхюб ву. Дурари ерли агьалйириз саб жюрейинра манигъ’вал апIурадар. Ухьухьна фукьан хялар гъафиш, ихь республикайин агьалйириз гьадмукьан хайир а. Фицики, туристари мушваъ харж апIру пул республикайиъ гъубзру.
Хъа ихь республикайиан жара йишвариз гъушу саспи жигьилари дагъустанлуйирин ад чIур апIуру. Мисал вуди, гьаму улихьна йигъари Санкт-Петербургдиъ гъабхьи дюшюшнакан ктибтурхьа.
Санкт-Петербург шагьур ихь уьлкейин культурайин меркезси гьисаб апIура. Душваъ яшамиш шулайи ерли инсанар гизаф низам-къайда хъайидар ву. Лазим дарди дурар жара касдин терефназдикьан лигрудар дар. Августдин 17-пи йигъан дина душнайи 20 йисаъ айи Ислам ва 21 йисаъ айи Арсен, йишвну лап кьанди Дворцовый набережныйдиъ, ички дубхъну пиян духьнайидар, шагьрин кючйириъ лицури, чиркин гафар апIури, рягьятвал гъадабгъурайи инсанарик ктукьуз хъюгъну.
Урусатдин Санкт-Петер-бургдиъ айи МВД-йин ГУ-йин мялуматарин гъуллугънаан хабар тувганси, 18 йисаъ айи Петербургдин агьали Александрди жигьиларикан къайдасузвалар дарапIувал ккун гъапIну. Натижайиъ Ислам ва Арсен Александриина алжагъну ва дугъан ликриз гаркIал гъивну. Дюшюшнан шагьидари полицияйиз дих гъапIну. Полицейскйири тахсиркрар гъидисну ва административ протоколар гъидикIну. Амма больницайиан гаркIлин зиян дубхьнайивалин гьякьнаан мялумат гъафиган, полицияйиъ уголовный дело ачмиш апIбан месела за гъапIну.
Гьюрматлу жигьилар! Ихь республикайин аьхюнуб пай агьалйири ислам дин хъапIрахьа. Гизаф жигьилари ички убхъувал зат кьабул апIурадар, ички айи сумчризкьан гъягъюри шулдар. Ухьу наана гъушишра, ихь дин, ихь сурат марцциди дюбхну ккунду. Дагъустандиъ айиган дин хъапIри, хъа гъирагъдиз гъушубси, фури алдабгъну деебтнайи гьяйванси духьну ккундар. Ухьу инсанар вухьа. Урусатдиъ ихь республикайикан гьацира ужуб ад адар. КабцIнайи саб агълижи вари лиж чиркин апIуру кIуруганси, Дагъустандин агьалйирин гьял-гьюрмат чIур мапIанай. Хъа, эгер республикайин аднакан фикир ктарш, ичв жигьил уьмур пуч мапIанай. Полицияйин хиларигъ гъяхъну кIуру документди ичв гележегдин хъуркьувалариз зарар тувди. Гьаддиз, жара йишваз гъушиган, ихтиятвал апIинай. Гьарсаб алдабгъру лик сабурлуди, аькьюллуди алдабгъай, апIру ляхин фикир дапIну тамам апIинай. Гъурабатдиъ аба-баб адар, насигьят тувру, увхъанди шлу касра дидрихъуз мумкин ву. Ичв абйир-бабариз нач хьуз гъитру ляхнар мапIанай. Жигьилвалин марцци сурат макабцIанай.
