Урхурайидарин хьадан тятIиларин вахт аьхирихъна гъюри, аьдат вуйиганси, гьарсаб йишваъ айи мектеб, расвалин ляхнар кIули духну, баяр-шубар кьабул апIуз гьязур шулу. Табасаран райондиъ мектебарин расвалин ляхин фици кIули гъабхураш ахтармиш апIувал метлеб вуди, узу улихьна йигъари Табасаран райондин образованиейин Управлениейин начальникдин заместитель Ринат Мирзабалаевдихьна илтIикIнийза ва дугъкан саб жерге суалариз жаваб тувуб ккун гъапIнийза. Ич арайиъ гъабхьи сюгьбат жикъиди исихъ чап апIурача.
– Ринат Мизамирович, цIийи урхбан йисахьна гьязур шули, Табасаран райондин мектебариъ фициб ляхин гъабхура?
– Гьарганси гьамусра, тятIиларин вахт ккудубкIайиз, мектебариъ урхурайидар рас дапIнайи, аку, марцци классариъ кьабул апIуз чалишмиш шулача. Табасаран райондиъ 59 мектеб, 37 бицIидарин багъ ва аьлава образование тувру 7 тешкилат а. Гьадрарин гьисабнаан 51 кьялан мектеб, 5 асас мектеб, 2 ккергъбан мектебар ва 1 образованиейин центр «Юлдаш» ву.
Образованиейин вари тешкилатариъ гъийин йигъаз расвалин айтIан ляхнар дапIну ккудукIна. Жвилли камивалар мектебаръ дарсар ккергъайиз рас дапIну ккудукIбанди ву.
Зиихъ къайд дапIнайи мектебарикан 18 мектеб, «100 мектеб» кIуру проектдиз асас вуди, капитально рас апIура.
Рас апIурайи мектебарикан вуди Аркарин, Гум’арин, Гурхнуарин, Гискарин, Зил’арин, Кьюрккарин, Куркгарин, Кюргъярин, Мягьрягъярин, Рушвларин, Улзарин, ФуркIларин, ХустIларин, Хили-Пенжигьарин, Ханк’арин, ЦIанкарин, Шил’арин, Ягъдигъарин мектебар гьисаб шулу.
«ЦIийи мектеб» кIуру федералин проектдиинди ва «Образование» кIуру халкьдин проектдиинди, Ягъдигъарин сабпи нумрайин кьялан мектебдикан 2020-пи йисан 1-пи сентябрихъан мина «Точка роста» кIуру цIийи центр хьибди.
– Образованиейин тешкилатар хатIалу дюшюшарихьан уьрхбан бадали, райондиъ фицдар серенжемар кьабул дапIна?
– Мектебарин цIийи урхбан йисахьна вуйи гьязурлугвалар ахтармиш апIбан бадали, 2020-пи йисан 11-пи мартдиъ Урусатдин мярифатнан Министерствойиан дуфнайи В6-593/03 нумрайин кагъзиз асас вуди, Табасаран райондин главайи кьабул гъапIу 92-пи нумрайин буйругъиинди 8-пи июндиъ идарйирин арайиъ вуйи комиссия тешкил дапIна.
Образованиейин улупнайи вари 90 идарйириъ хатIасузвалин паспортарра кьабул дапIна, вари йишвариъ гъаравларра дерккна. Гьаму буйругъиъ улупнайи тIалабар гьял апIбан бадали, образованиейин гьарсаб идарайиъ чпин буйругъ кьабул дапIна, ва цIийи урхбан йис ккебгъайиз фицдар серенжемар гъахуруш, чпин планар йитIна.
– Табасаран райондиъ фицдар мектебар аварийный гьялнаъ айидарси гьисаб дапIна?
– Табасаран райондин администрацияйин идарйирин арайиъ вуйи комиссияйин актариинди, райондин 12 мектеб аварийный гьялнаъ айиб гьисаб дапIна. Дурар гьамрар ву: Хюрккарин, ГьепIларин, Акъ’арин, Турфарин, Жулжгъарин, Гюгьрягъярин, Дарвгъарин сабпи нумрайин мектеб, Мягьрягъярин, СертIларин, Пилгъарин, Гурхъарин, Сиртчарин. Гюзчивал гъабхру органарин къарариинди гьамцдар мектебар хъяркьюзра мумкинвал а.
