Гьарсаб гьюкуматдиз думу жара гьюкуматарихьан тафавутлу апIурайи хусуси лишнар а. Думу лишнариъ гьарсаб уьлкейин ватандашариз аьхю мяна ади шулу.
Август вазлин 22-пи йигъ Урусатдин агьалйириз мяналу – Урусатдин Федерацияйин Гьюкуматдин пайдгъин Йигъ ву. Пайдагъ – гьюкуматдин важиблу лишнарикан саб ву. Пайдагъ – му Ватандихьна вуйи гьюрматнан, сабвалин ва албагнайивалин, милли культурайиз вафалувалин лишанра ву.
Гьюкуматдин пайдагъ гакIвлин маргълик кибтIнайи саб ясана кьюб-шубуб рангнан ва дидик каънайи лишнарикан ибарат вуйи парчи ву. Пайдагъ, микI хъайи йишвахь гьарган тIубччвури кебхбан бадали, арайиз гъабхиб ву. Гьаддиз думу ягъалдиси, инсанари чпин уьлкейиин дамагъ апIбан бадали, варидариз рябкъру йишвак кибтIру.
Кюгьне вахтарихъан мина ихь ата-бабйири эскервалин машгьурвалин пайдгъариккди женгар гъахури гъахьну. Пайдгъиз гьюрмат апIувал, дидиз вафалувал улупувал, дявдиъ думу уьбхювал – гьарсаб уьлкейин аьдат ву. Пайдгъи ватанагьлийирин ватанпервервалин, вафалувалин гьиссар уягъ хьуз гъитру, диди инсанар тешкиллу ва сатIи апIуру.
Урусатдин гьюкуматдин пайдагъ шубуб сабсдар рангарикан ибарат вуйи юкьуб мурччван парчи ву: варитIан зиин лизи ранг, кьялаъ укIу ранг, варитIан кIанакк ккайиб уьру ранг ву. Лизи рангну ислягьвал, гьякьлувал, тахсир ктрувал тяйин апIуру, укIу ранг марцци заварин, вафалувалин, рюгьлувалин лишан ву. Уьру рангну дирбаш’вал, ифи, цIа, жан фида апIувал улупуру.
Урусатдин Федерацияйин Гьюкуматдин пайдгъин Йигъ РФ-дин Президентдин Указдиинди 1994-пи йисан тяйин гъапIну.
