Дагъустандиъ коронавирусдин инфекцияйихъди аьлакьалу вуйи уьзриан медицинайин 40-тIан артухъ гъуллугъчйир гъийихну. Дидин гьякьнаан республикайин сагъламвал уьбхбан министр Жамалудин Гьяжиибрагьимовди къайд гъапIнийи. Духтирвалин пише гизаф жавабдар ва гьюрматлу пише ву.
Дербент шагьрин саб паркдиъ коронавирусдин инфекцияйин пандемия мялум дапIнайи вахтна гъийиху медицинайин гъуллугъчйирин гьюрматназ ядигар тикмиш апIиди. Дидин гьякьнаан шагьрин администрацияйин мялуматарин гъуллугънаан хабар тувра.
Тешкиллувалин десте духтрариз ядигар дивбан теклиф хьади Дербентдин мэрихьна илтIикIну. Хизри Абакаровди теклифнан тереф гъюбхну.
Ядигарин автор РФ-дин лайикьлу художник, Дагъустан халкьдин художник Шариф Шагьмарданов ву. Гранитдин бинайиин кемшрикан дапIнайи духтрин кIалиб дивди. Гъваларихъ хъайи машариъ Дагъустандиъ гъийиху духтрарин ччвурар дикIиди.
