«Кафари Кавказдин Россетар» ПАО-йи харж гъапIу электроэнергия гьисаб апIру приборар дигиш апIуз хъюгъра. Думу метлебариз компанияйи 1,1 миллиард манат харж апIбанди ву.
Компанияйин планариинди, сифте республикайин миржиб райондиъ УнцIукIуль, Тлярата, Гергебил, Шамил, Хунзах, Ахты, БотIлих ва Гъяйтагъ районариъ 34 агъзур фикирлу приборар китIбанди ву.
«Электроэнергия дубгувал цIиб апIру программа уьмриз кечирмиш апIбан сабпи пайнаъ гизафси электроэнергия дубграйи районар аьгъю дапIна. Фикирлу приборар китIбан программа вари республикайиъ кьувватнаъ убчIвди», – къайд гъапIну, Кафари Кавказдин Россетар» ПАО-йин генеральный директор Виталий Ивановди.
Къайд апIувал лазим вуки, фикирлу гъурулушди электроэнергия дубгувал цIиб апIиди, фицики гьамусдин деврин цифрайин приборари электроэнергия ишлетмиш апIбан кьадар манзилнаъди аьгъю апIуз мумкинвал тувди. Думу гъурулушди электроэнергия икI апIуз фикирлу приборарин ляхник жарарин хил кубкIуз гъитидар.
Дагъустандин аьтрафариин «Кафари Кавказдин Россетар» ПАО-йин филиал «Дагъэнергойи» чан муштарйирин сиягьдиъра къайда дебккбанди ву. «Дагъэнергойин» филиалин директорин заместитель Иван Солянниковдин гафариинди, электроэнергия масу туврури электроэнергия ишлетмиш апIру вари касарихъди, гьадму гьисабнаан юридический касарихъдира йикьрар йитIиди.
Электроэнергия масу тувру компанйири му жюрейин уьлчмйир кьабул апIувалин чарасузвал арайиз дуфна, фицики Дагъустан Республика энергетикариз 42 миллиард манатдин буржлу ву. Аьламатнан ляхин ву — улупнайи кьадарнакан 6 миллиард манат агьалйирин буржар, 4 миллиард манат ЖКХ-йин карханйирин буржар ву, хъа имбу кьадар жара карханйириин ва бизнесдиин алахьура.
Гьаму ва жара месэлйириз бахш дапIну, улихьна «Дагъправда» газатдиъ пресс-конференция кIули гъубшнийи. Пресс-конференцияйиъ «Ватан» корпорацияйин президент, РД-йиъ айи «Фонд Байбакова» вакилвалин идарайин директор Гьяжи Гьяжиев, «ТСО Дейтрон» тешкилатдин генеральный директор Аджягьмед Сяидов, «Энергопроект-М» ООО-йин директор Мягьямед Мягьямедов ва Микаил Аьбдурягьимов иштирак гъахьнийи.
Гьяжи Гьяжиевдин гафариинди, республикайин энерготранспортдин гъурулушдиъ йисандин арайиъ 1,56 миллиард киловатт сяаьт электроэнергия дубгура. Му Миатли жюрейин ГЭС-дин гьясиллувалин 2,5 кьадарназ барабар ву. Дугъу къайд гъапIганси, 2019-пи йисан Дагъустандин ГЭС-ари 4,2 миллиард киловатт сяаьт электроэнергия гьясил гъапIну, хъа вари ишлетмиш гъапIуб 6,7 миллиард киловатт сяаьт удубчIвура. Электроэнергия гьубкIри адрувал ачухъди рябкъюра. Гьаму гьисабариз асас вуди, республикайиъ айи гидроэнергетикайин мумкинвалар аьхюдар вушра, жара йишвариан электроэнергия хътапIбанди ву. Му цирклиъ электроэнергияйин кьитвал айивал думу икI апIбахъди алакьалу ву. Гьамус думу жюре гьяракатарихъди женг гъабхура.
Пресс-конференцияйиъ удучIвну гъулху Аджягьмед Сяидовди, Мягьямед Мягьямедовди, Микаил Аьбдурягьимовди электроэнергия кьяняаьтлуди ишлетмиш апIбакан, гележегдиъ, ригъдин энергия, водород ишлетмиш апIури, агьалйириз багьа дару электроэнергия тямин апIуз шлуваликан ктибтнийи.
Аьхиримжи йисари гьюкуматди, агьалйир электроэнергияйихъди бегьемди тямин апIбан бадали, гизаф уьчмйир кьабул дапIна. Амма лазим вуйи натижйирихъна дуфнадар. Дубгурайи электроэнергия наанди гъябгъюраш, гьамусра дибихънадар.
