Табасаран баяри спотдин цирклиъ гьаммишан заан хъуркьувалар улупура, гьадму гьисабнаан вари дюн’яйиз машгьур дубхьнайи ММА-йин турнирариъра. Гьацдар дирбаш спортсменарикан сар ихь ватанагьли Рустам Керимовра ву. Рустам спортдин ММА жюрейин кчIихбарин Урусатдин, Европайин ва вари дюн’яйин чемпион ву.
Дугъу 14 ражари пишекарвалин кчIихбар гъурхну ва гьеле думу ккагъуз сарихьанра гъабхьундар, я хьибдира дар кIури, миж кивурхьа. Гьаму йигъари Рустам багъри «Табасарандин нурар» газатдин редакцияйиз хялижвди гъафну. ИкибаштIан, машгьур спортсмен учу сюгьбат дарапIди деетундайча.
Рустам Керимов Дербент шагьриъ бабкан гъахьну. Дугъан абйир-бабар Хив райондин Яргъил гъул’ан ву. Рустам байвахтнахъан мина спортдиин юкIв алир вуйивализ лигну, дадайи дугъаз шагьриъ чан тай баярихъди спортдин зализ гъягъюз манигъ’вал апIури гъахьундар.
Гьамусяаьт Рустам Мягьячгъала шагьриъ яшамиш шула. Урусатдиъ варитIан ужудар спортдин клубарикан сабси гьисаб апIурайи «Dagestan Fighter» пишекарвалин спортклубдиъ тренировкйириз гъягъюра. Дугъан тренерар Мансур Учакаев ва Мягьямед Багьандов ву.
«Дербентдиъ узухъди мектебдиъ урхурайи хайлин баярихъди сатIиди узура, сифте спортдин ушу-саньдайин кчIихбарин жюрейиин машгъул духьну, ихь машгьур, кIубан спортсмен ва тренер, ушу-саньдайиан шубуб ражари вари дюн’яйин чемпион гъахьи Назим Абасовдихьна гъягъюри гъахьунза. Фунур вушра инсанди, хъуркьуваларихьна гъюбан бадали, чан кьувватар гьяйиф дарапIди зегьмет зигури ккунду, гьадму гьисабнаан спортсменарира. Сабпи гъалибвалар, аьдат вуйиганси, багъри шагьриъ гъягъюри гъахьи талитариъ гъадагъуз хъюгънийза. 2014-пи йисан сабпи ражари пишекарвалин заан дережайин талитариъ иштирак хьуб кьисмат гъабхьнийзуз. Гъийин йигъаз узу ММА-йиъ 61-кило гъагъ айи спортсменарин арайиз Урусатдин, Европайин ва вари дюн’яйин чемпионвалин ччвурар гъазанмиш дапIназа. Миржиб ваз мидиз улихьна «Ахмат» лигайин чемпионатдиъра иштирак хьуб кьисмат гъабхьунзуз. Гьадушваъра узухъди талитнаъ айирихьди узу ккагъуз гъитундайза», – ктибтура Рустам Керимовди.
Рустамди, Дербент шагьриъ 15-пи нумрайин мектеб ккудубкIбан кьяляхъ, Ростов шагьрин Гьюкуматдин Экономикайин университетдиъ гъурхну. 2017-пи йисан дугъу АСА лигайихъди йикьрар гъийитIну. 2019-пи йисан мартдин вазлиъ Рустамди думу лигайи тешкил гъапIу талитариъ Аьбдул-Рягьман Дудаевдихъди вуйи кчIихбариъ заан хъуркьувалар улупну ва чимпионвал тасдикь апIру чIулин сагьиб гъахьну. Гьадму йисан декабрин вазлиъ Рустамди, чав гъазанмиш гъапIу титул уьбхюри, Санкт-Петербург шагьриъ талитнаъ айи вахтна, Бразилияйин машгьур спортсмен Франсиско де Лиму Масиэл нокаутдиз гьаъру. Гъябгъюрайи йисан январин вазлиъ АСА-лигайи Рустам Керимовди чемпионвалин чIул кьяляхъ тувуваликан ва лигайиан думу удучIвуваликан мялумат тувну. Гьамусяаьт Рустам Керимов чаз UFC-йин талитариз дих апIайиз ккилигура.
«Узу, вари дюн’яйин спортдин машгьур шубуб аьхю тешкилатарихъди йикьрар йитIну, жюрбежюр талитариъ иштирак шули гъахьунза. Вари тешкилатариъ варитIан заан ччвурар гъазанмиш апIуз гъабхьунзухьан. Узу йиз улихь саб метлеб дивраза – фуну талитариъра чемпион хьувал! ACB-лигайиъ айи вахтна, узуз, UFC-йиъси, Rizin-лигайин талитариъра иштирак хьуз теклифар гъюри гъахьунзуз. Аьхю пуларра тувуз гаф тувнийи. Амма, думу вахтна, АСВ-йихъди йикьрар йитIнайивализ лигну, жара тешкилатарин талитариъ иштирак хьуз ихтияр адайи. Йиз кIваъ наан ашра ужудар кчIихбар улупувал ва чемпионвалин ччвур гъазанмиш апIувал айиз»,
– гъапну Рустамди.
Чан хъуркьувалар ва гъалибвалар Рустамди дадайиз, багахьлуйириз ва чахъан юкIв убгурайидариз бахш апIура. Чемпионатдин кьяляхъ дугъу сабпи зенгра дадайиз апIуру. Рустамдин дада Сефьяханум Дербент шагьриъ больницайиъ духтирди лихури, 30 йистIан артухъра шула. Рустамдиз кьюрсана гъардаш а. Дурар чпин ляхнариин машгъул ву.
Гъийин деврин вари жигьилариз ва живанариз Рустамди чпин улихь диву метлебарихъ хъуркьбан рякъяр агувал, читинваларихьан гучI дарапIувал, аьгъювалар гъадагъбиин, спортдиин машгъул хьувал ккун гъапIну. Ич терефнаан Рустамдиз, UFC-йин чемпион духьну, «Табасардин нурар» газатдин редакцияйиз хялижвди гъювал ккун апIурача. Дугъриданра, ихь баяри чпин бицIи Табасаран, Урусатдизси, вари дюн’яйизра машгьур апIруган, юкIв дамагъну абцIру. Гъит ихь машгьур спортсмендин кIван марцци хиялар багахь гележегдиъ тамам ишри.
