Сентябрин 8-пи йигъан республикайиз кикбоксдиан Урусатдин чемпионатдин гъалибчйир ва пешкешнан йишварин сагьибар кьяляхъ гъафну.

 

КIваин апIуз ккундучуз, гьаму йигъари Ульяновск шагьриъ кикбоксдиан вари Урусатдин чемпионат кIули гъубшну. Думу талитариъ Дагъустандин спортсменари 2 гъизилин, 1 арсран ва 4 кемшрин медалар гъазанмиш гъапIну. Сабпи йишварин сагьибар Темирлан Бегмурзаев (60 кило гъагъ) ва Ибрагьим Абдулмеджидов (60 килограмм гъагъ) гъахьну.

 

Кьюбпи йишв Ильяс Къадирагъаевди гъибисну (+91 килограмм). Шубубпи йишвар Уллубий Закарьяевди (63,5 килограмм), Мягьямед Уматовди ва Мягьямед Къурбановди (кьюридра 91 килограмм), Мягьямедарип Мягьямедовди (67 килограмм) гъазанмиш гъапIну.

 

Кикбоксингдиан Урусатдин чемпионатдиъ медалар гъадагъдар ва дурарин тренерар къаршуламиш апIуз аэропортдиз РД-йин спортдин ва физический культурайин министерствойин вакилар, спортсменарин багахьлуйир ва дустар гъафнийи. Спортсменар ва дурарин тренерар гъадагъу хъуркьувалаихъди РД-йин спортдин ва физический культурайин министр Мягьямед Мягьямедовдин ччвурнахъан РД-йин Минспортдин управлениейин начальник Халитбег Мягьячевди тебрик гъапIну.

 

«Ургуб медаль – ужуб натижа ву. минспортдин, министр Мягьямед Мягьямедовдин терефнаан учву тебрик апIурача. Гьаму учву гъазанмиш гъапIу гъизилин ва арсран медалари учвуз вари халкьарин чемпионатдиз, гьадму гьисабнаан Европайин ва вари дюн’яйин талитаризра, рякъ ачмиш апIурайивали ич юкIвар артухъси дамагълу апIура. Ужуб гьязурвал ади гъушиш, гьадму талитариъра учву гъалиб шлувалиин умудлу вуча. Учвуз хуркьувалар ишри!» – гъапну Халитбег Махачевди.

 

Гъалибчйирин адресназ хайлин касари мани гафар гъапнийи ва гележегдиъ чпин мурадарихъ хъуркьувал ккун гъапIнийи.