Сентябрин 8-диъ, Расул Гьямзатов бабкан гъахьи йигъан, Дагъустандин шагьрариъ ва районариъ «Лизи кьарнийир» фестиваль ачмиш гъапIну. Думу серенжем ЮНЕСКОЙИН лишниккди гъабхури хайлин йисар ву. Аьдат вуйиганси, фестивализ Урусатдин гизаф регионариан хялар гъафнийи.
Шадлугънан мяракйир Мягьячгъала шагьриъ ТаркиТау дагъдикк республикайин халкьдин шаир Расул Гьямзатовдин накьвдиин ва Мягьячгъала шагьриъ М.Горькийин ччвурнахъ хъайи Урус драмайин театрин улихь хьайи Расул Гьямзатовдин ядигариин кюкйир дивбалан ккергънийи.
«Лизи кьарнийир» фестиваль республикайин уьмриъ аьхю эгьемият айи машквар гъабхьну. Му йигъар, республикайиъси, Урусатдиъра важиблударси гьисаб дапIна.
Серенжемариъ РД-йин Халкьдин Собраниейин председатель Хизри Шихсяидов, республикайин Правительствойин председателин сарпи заместитель Анатолий Карибов, региондин министерствйирин ва идарйирин кIулиъ айидар, Урусатдин ва Дагъустандин писателарин Союздин вакилар, гьацира шаирин юлдшар ва майилмадатар иштирак гъахьну. ЦIиб вахтналан Мягьячгъала шагьриъ Лениндин комсомолин ччвурнахъ хъайи паркдиъ Игит Эскрин мемориалихъ «Лизи кьарнийир» фестивалин асас серенжем ккебгъну.
Серенжем Анатолий Карибовди ачмиш гъапIнийи. Дугъу уч духьнайидар ва гьаму фестивалиъ иштирак хьуз Дагъустандиз дуфнайи хялар къаршуламиш апIури, гъи арайиз гъюрайи жюрбежюр месэлйириз дилигди, республикайиз машквраз гъюз вахт гъабгувализ чухсагъул мялум гъапIну.
«Гьямзатовдин «Лизи кьарнийирин» йигъар – му ихь машгьур шаириз лайикьлу кьимат тувувалси, му машквар дявдин женгариъ чпин жанар ватан бадали фида гъапIу игит эскрариз чухсагъул мялум апIувалра ву»,
– къайд гъапIну А. Карибовди.
Тебрикнан гафар Урусатдин ва Дагъустандин писателарин Союздин вакилари ва гьацира РФ-дин жюрбежюр регионариан дуфнайи хяларира гъапнийи.
Гьадму йигъан республикайин телеканалариан Расул Гьямзатовдиз бахш вуйи пере- дачйир улупнийи. Ва сабпи йигъан аьхириъ поэзияйин Театриъ Расул Гьямзатовдин гьюрматназ Урусатдин поэзияйин мажлис кIули гъубхну.
«Лизи кьарнийир» фестиваль Дербент, Хунзах ва жара районариъра яркьуди къайд гъапIнийи. Му йигъар сентябрин 10-диз давам гъахьну.
