Гъубшу элгьет йигъан Табасаран райондин Хючна гъулаъ, Аьхю Гъалибвалин 75 йис тамам хьпаз бахш вуди, мини-футболиан республикайин ачухъ турнир кIули гъубшну.
Талитар жигьиларин ляхнариз лигру Федералин агентствойин (Росмолодежь) вари Урусатдин жигьиларин проектарин конкурсдин грантар уьмриз кечирмиш апIбан дахилнаъди тешкил дапIнайи. Хъа му турнир гъабхбан проектра кади грант гъазанмиш гъапIур РД-йин жигьиларин ляхнариз лигру Министерствойин «Республикайин жигьиларин центр» РД-йин ГКУ-йин директорин заместитель Марат Рягьимов ву. Табасаран райондин администрацияйира талитар тешкил апIуз кюмек тувну.
Роспотребнадзорин тIалабариз асас вуди, футбол уйнамиш апIру йигъари стадиондиз гъюруган, талитарин иштиракчйирин ва тамашичйирин бедендин температура ебцури, хиларин дезинфекция апIури, маскйир алахьувал ккун апIури гъахьнийи.
Мини-футболиан вуйи талитариъ респуб-ликайин шагьрариан ва районариан вари 14 команда иштирак гъахьнийи. Улупнайи къайдайиз асас вуди, дурар 4 дестейиз пай дапIну, вари командйир чиб-чпихъди гюрюшмиш шлуганси талитар гъухну, ужударсдар командйир полуфинализ удучIвну.
Полуфиналин талитариъ сабпи жут СтIал Сулейман райондин ва Хасавюрт шагьрин командйирикан ибарат гъабхьнийи, хъа финализ вуйи кьюбпи путевка бадали Табасаран ва Докъузпара районарин командйири женг гъубхнийи. Сабпи жутнан талитнаъ СтIал Сулейман райондин командайи, хъа кьюбпи жутнан талитнаъ – Табасаран райондин командайи гъалибвал гъадабгъну. Думу командйир финализра удучIвну.
Финалиъ футбол уйнамиш апIбан асас вахт 1:1 гьисабниинди ккудубкIну, хъа пенальтйир йивбаъ СтIал Сулейман райондин футболистари ужуб гьязурлугвал улупну.
Мини-футболин талитарин гъалибчйириз ва пешкешнан йишвар гъадагъдариз пешкешар тувбан серенжемдиъ Табасаран райондин глава Мягьямед Къурбанов ва Табасаран райондиз ляхнин месэлйир гьял апIуз дуфнайи РД-йин Правительствойин председателин заместитель Инсаф Хайруллин иштирак гъахьнийи.
«Футболиан вуйи талитар аьдатнаъ ирчдихьа ва дурариъ гьар йисан иштирак шлударин кьадар яркьу апIидихьа. Футболиз райондиъ гизаф фикир туврахьа. Саб гъубшу йисан райондин гъулариъ аьлава вуди 10-сан майдан тикмиш дапIна»,
– къайд гъапIну Мягьямед Къурбановди чан улхбаъ.
