Дагъустан Республикайин сагъламвал уьбхбан Министерствойиан туврайи мялуматариинди, Дагъустандиъ гриппдиз аькси прививкйир апIбан кампания ккебгъра. Региондиз аьхю яшнан касариз вуйи «Совигрипп» ва «Флю-М» вакцинйирин 227 агъзур доза айи сабпи партия хъубкьна. Гьамусяаьт вакцинйир республикайин медицинайин идарйирин арайиъ пай апIура. Гъи-закур бицIидариз вуйи вакцинайин 333 агъзур дозасан хъуркьди.
РД-йин сагъламвал уьбхбан министр Жамалудин Гьяжиибрагьимовди ва Республикайин Роспотребнадзорин Управлениейин кIулиъ айи Николай Павловди республикайин ватандашарикан гриппдиз ва пневмококковый инфекцияйин вакцинайиз аьксивал улулупуз теклиф апIура. Думу вакцинайин рубар дурари чпира гъивну.
Республикайин Минздравдин пресс-гъуллугънаан туву мялуматариинди, му кьюбиб прививкйирра Урусатдиъ гьязур гъапIдар ву.
Николай Павловдин гафариинди, гъийин йигъан вирусдин инфекцияйиз аькси профилактика гъабхбаъ мянфяаьтлувал улупурайиб анжагъ гриппдин вакцинатIан дар.
Хъа Жамалудин Гьяжиибрагьимовди чав кIулиъ ади республикайин сагъламвал уьбхбан Министерствойин вари вакилари гьар йисан прививкайин руб йивурайивал ва дидкан зарар адрувал къайд гъапIну.
КIваина хурача, республикайиъ 60% агьалйирин гриппдиз аькси прививкйир апIбанди ву. Духтрарин ва вирусологияйин пишекрарин гафариинди, думу уьлчмйири коронавирусдин тIягъвнин вахтна гриппдин тIягъюнра гъагъи дархьуз кюмек апIиди. «Гьаму чвлин вахтна рагъру уьзрар ктIручIвбан бадали, дурариз аькси рубар йивувал чарасуз лазим ву. Ухьу гьарсари жвуван ва жвуван багахьлуйирин сагъламвал уьбхюваликан фикир дапIну ккунду», – кIура республикайин агьалйириз медицинайин кюмек тувру Управлениейин начальник Муслимат Гьясановайи.
Сифте гриппдиз аькси вуйи прививкйир гьаммишан жара инсанарихъди аьлакьайиъ ади шлу пишйирин вакилари дапIну ккунду. Дурарин сиягьнак мялимар, духтрар, ипIру-убхъруб масу тувру жямяаьтлугъ идарйириъ лихурайидар ва гьацдар жара касар кахьра. Гьацира прививкйир яшлуйи- ри, кIван, гъурдларин уьзрар кайидари, сахарный диабет жюрейин сагъ апIуз даршлу уьзрариан аьзарлу духьнайи касари дапIну ккунду.
Пишекрарин гафариинди, гьар йисан гриппдиз аькси вакцина, гъябгъюрайи фаслиъ тарабгъру штаммариз дилигну, ВОЗ-дин теклифариинди цIийи алапIура. Гьаци вуйиган, гриппдиз аькси вакцинайин мянфяаьтлувал швнуб-саб ражари за шула, фицики деврин дармнар гъябгъюрайи йисан жанлуди тарабгъру гриппдин штаммариан гьязур дапIнайидар ву.
