Дагъустандин гьюкмари региондиз COVID-19 уьзриз аькси вакцина мичIлишнаъ убхру 60 камера масу гъадагъну. Дидин гьякьнаан ич газатдиз Дагъустан Республикайин Минздравдин мялуматарин гъуллугънаан хабар тувну. Вакцина уьбхру камерйир Дагъустандин муниципалитетарин медицинайин идарйирин арайиъ пай гъапIну.
КIваина хурача, 11-пи августдиъ ихь уьлкейиъ, Гамалейин ччвурнахъ хъайи Центриъ дюн’яйиъ сабпи ражари вуди коронавирусдиз аькси вакцина гьисабназ гъадабгъну. Дидиз «Спутник V» ччвур тувну. Мялуматарин гъуллугънаан туврайи хабрариз асас вуди, вакцинайи инсандин бедендиъ 2 йисан коронавирусдиз аькси иммунитет уьбхюру.
Улихьна йигъари РФ-дин Минздравдин кIулиъ айи Михаил Мурашкойи мялум гъапIганси, вакцина регионариз хътапIбан ляхин гьяракатнаъ ипна.
* * *
Роспотребнадзорин РД-йиъ айи Управлениейин сентябрин 17-пи йигъаз вуйи улупбариинди, Дагъустандиъ коронавирус тарабгъувалин аьгьвалат гьамциб ву:
– республикайиъ коронавирусдин уьзур кубчIвдарин уьмуми кьадар 12345 кас ву (аьхиримжи йишван ва йигъан му уьзур кайи 85 кас ашкар гъахьну);
– 10597 кас думу уьзриан сагъ гъахьну (аьхиримжи йишван ва йигъан – 64 кас);
– коронавирус уьзриан вари 533 кас гъийихну (аьхиримжи йишван ва йигъан – 4 кас);
– республикайиъ 478645 касдин уьзур кайивал аьгъю апIру (тестар) ахтармишар гъухну;
– гьамусяаьт 2945 кас, жара инсанарихъди аьлакьа дархьбан бадали, хулариан удудучIври дусна.
Гьюрматлу ватанагьлийир! Роспотребнадзорин тIалабар шлубкьан тамам апIуз чалишмиш йихьай. Ичв ва багахьлуйирин сагъламвал уьбхяй. Бедендин температура за гъабхьиган, жин мапIанай, вахтниинди духтрихьна илтIикIай. Вари сагъ ишричву!
