Дагъустан Республикайин мектебариъ мани хураг гьивуз шартIар тешкил апIбан ляхин давам шула. Му месэлайин гьякьнаан сентябрин 16-пи йигъан РД-йин Правительствойиъ Урусатдин мярифатнан министрин заместитель Екатерина Толстиковайин регьберваликди видеоконференцияйин къайдайиинди совещание кIули гъубшну.
Гъийин йигъаз Дагъустандин мектебариъ ккергъбан классариъ урхурайи вари баяр-шубар мани хурагнахъди тямин апIура. Амма мани хураг гьязур апIуз, думу бицIидариз гьивуз вари мектебариъ сабсдар шартIар адар. Республикайин уьмуми образованиейин 150 мектебдиъ мани хураг гьязур апIру йишвар затра адар. Думу мектебариз мани хураг жара йишвариъ гьязур дапIну хура. Дицдар мектебариъ СанПиНдин тIалабариз жаваб тувру, чарасуз лазим вуйи шартIар тешкил апIбан зиин ляхин гъабхура.
КIваин апIуз ккундучуз, августдин вазлиъ республикайин 604 мектебдиъ мани хураг гьивуз шартIар адайи. Думу мектебариъ 1-4-пи классариъ 68,6 агъзур ученикди урхура. Гъийин йигъаз 454 мектебди думу ляхин къайдайиз дубхна.
Совещаниейиъ муниципалитетарин главйири йи-швариин гъахурайи ляхнарикан ктибтну. Гъябгъюрайи гьяфтайиъ шубубсана мектебди му месэлайиан айи камивалар арайиан адагъну. Ляхин графикдин къайдайиинди кIули гъабхура. Кьабул апIурайи уьлчмйир РД-йин образованиейинна илимдин Министерствойи ва РД-йиъ айи Роспотребнадзорин Управлениейи гьар йигъан мониторинг гъабхбан къайда-йиъди гюзчиваликк уьрхюра.
Совещаниейин кьяляхъ узу, му месэла Табасаран райондиъ фици гьял дапIнаш ахтармиш апIури, думу райондин образованиейин управлениейин кIулиъ айи Аьбдусалам Гьясановдихъди сюгьбат гъубхнийза.
Начальникдин гафариинди, Табасаран райондин вари мектебариъ 1-4-пи классариъ урхурайи баяр-шубариз мани хураг гьивра.
«Месэла гъагъиди ди-йибгънайивал гьаддиъ аки, райондин аьхюну пай мектебари СанПиНдин тIалабариз жаваб туврадар. Ихь мектебар типовой къайдайиндар дарувал ва мумкинвалар хуз даршлувал гьисабназ гъадабгъну, думу тешкилатди мани хураг гьивуз ихтияр тувна. Сифте райондиъ мани хураг гьивуз саб жюрейинра мумкинвал адру мектебар 38 вуйи. Яна РД-йиъ айи Роспотребнадзорин Управлениейиан му мектебариъ бицIидариз мани хураг гьивбаз разивал туври гъахьундайи. Му месэла гьял апIбаан учу хайлин ляхин гъубхунча. Сабсана кIурза, СанПиНдин тIалабариинди мани хураг гьивбан ва гьязур апIбан тешкиллувалин ляхнар кIули гъахуз мектебди 13 йишв вая класс жара дапIнади ккунду: хураг гьязур апIру, гьивру, ипIру сурсатар уьрхру, хилар жикIру, гъаб-гъажагъ жибкIру йишвар, склад ва гь.ж. Хъа ихь бязи мектебариъкьан уьмуми кьадар 13 класс адарихь. Гьаддиз дурар райондин мумкинвал адру мектебариъ му метлебариз кьюб класс жара дапIну ккунивалиин дийигъну. Сабдиъ мани хураг гьязур апIура, тмунубдиъ – хураг гьивра. Учу сар дилаварчи касдихъди йикьрар гъийитIунча. Дугъу райондин мектебариъ мани хураг гьязур апIуз лазим вуйи вари оборудование масу гъадабгъну. Гьаму йигъари учу райондин швнуб-саб мектебдиз улукьуз ва мани хураг гьивбан тешкиллувал ахтармиш апIуз гъушнийча. Пуз ккундузузки, бицIидар лапра разиди айи. Хурагра мар-цциди ва тIяаьмлуди гьязур апIура»,
– гъапну Аьбдусалам Гьясановди.
Узу дугъахъ хъугъраза, ав, хураг тIяаьмлуб вушул. Узу мюгьтал апIурайи суал жараб ву – СанПиНди мани хураг гьивбан ва гьязур апIбан тешкиллувалин ляхнар кIули гъахуз чарасуз вуди 13 хал жара дапIну ккунивалин тIалаб улупруган, фуну районар ва мектебар гьисабназ гъадагъну гъахьнийкIан? Рябкъру гьялариан, думу тешкилатдин вакилар дагълу гъуларин имиди гъубзри, Кавказдин респуб-ликйирин мектебаризкьан улукьуз гъафиганси дар.
