Дагъустан, дуствалин гъаласи, чIаларин дагъра ву. Янаки, мушваъ 30-тIан артухъ миллетар яшанмиш шули, арайиъ сир-аьлакьа ади, аьхюр-бицIирихьна вуйи хатур-гьюрмат заан дережайиъ уьбхюри, насларихьан насларихьна рубкьури, магьа швунуб-саб аьсир ккадаъна.

 

Гьаму мяналу предложениейин вари сабхилди гъавриъ шул дупну, узуз умудлу хьуз ккундузуз. Республикайин миллеттар жа-жарадар вушра, миллетарин арайиъ хураг айи зах саб ву. Гьадму аьгьвалат гьисабназ гъадабгъну, 2011-пи йисан 6-пи июлиъ 104-пи нумрайин указдиинди 15-пи сентябрь Дагъустан Республикайин халкьдин сабвалин Йигъси къайд гъапIну.

Му йигъ къаршуламиш апIури, Хив райондин культурайин, спортдин, жигьиларин политикайин ва туризмдин отделин начальник К.З. Къазиевдин ва Хив райондин глава Я.Аь. Ярметовдин къарарниинди, райондин культурайин хулариъ, гъуларин музеяриъ ва мектебариъ саб жерге серенжемар кIули гъушну. ЦIар ккадатури кIваин апIуз ккундузуз, ГъуштIил гъулан СДК-йин директор Рамазан Бабаевди ва Хив райондин культурайин Хулан ва Хив райиондин театрин иштиракчи Ферида Байрамовайи райондиъ кIули гъушу серенжемарик аьхю пай кивну.

Къайд дапIну ккундуки, гьам гъизигу зегьмет ва жафа кIвак гъибисиш, мектебариъ урхурайидариз, гъюрайи наслариз гизаф мянфяаьтлу серенжемар кIули гъушну. Халкьдин фольклориз, дуланажагъдиз, табасаран ва лезги халкьарин милли хурагариз, табасаран ва лезги халкьарин аьдати палтарин ва ялхъвнарин чешнйириз, халачйирин устадарикан вуйи спектаклариз ва мяълийириз кьимат, фикир тувиш, ихь арайиан культурайин ирс гъирагъдизди дурубшрубдиин узу умудлу вуза.