Гьаму йис улубкьхъан мина ихь уьмриъ убчIву коронавирусдин уьзри агьалйирин яшайишдин къайдйир хайлин дигиш гъапIну. Къайд апIувал лазим вуки, сифте ихь инсанар уьзрикан вуйи мялуматарихъ хъугъри гъахьундар.
Мурар вари гьюкмарин, политикайин вакилари, духтрари чпиз хайир ктабгъбан бадали апIурайи ляхнарси гьисаб апIури гъахьну. Апрелин ваз кубкIну цIиб вахтналан республикайин больницйир аьзарлуйирихьди ацIиган, хъа думу уьзур аьдати гриппсиб ву кIури, хулариъ гъузу касар йихуз хъюгъиган, инсанарик гъалабулугъвал кабхънийи. Му аьгьвалатнаъ варитIан аьхю гъагъ духтрарин, медсестрйирин гъюнариин алабхъну. Дявдин вахтна эскрар женгназ гъягъруганси, ихь духт-рар сарпидар вуди чIуру уьзрихъди женгназ гъушнийи. Дурарикан гизафдар, уьзур кубчIвну, гъийихну. Духтрар гъийин деврин игитарси гьисаб ву.
Сентябрин 16-пи йигъан «Дагъустан» РИА-йин конференцйир гъахру залиъ Дагъустандиъ коронавирусдихъди женг гъубху духтрарин реабилитация гъапIу «Духтрариз аферин» акцияйин тешкилатчи, М.В. Ломоносовдин ччвурнахъ хъайи МГУ-йин профессор, «Кьарнийир» кIуру илимдинна сагъламвал уьбхбан комплексдин генеральный директор Мягьямед Мягьямедов журналистарихъди гюрюшмиш гъахьнийи. Каспий гьюлин гъирагъдихъ ерлешмиш дубхьнайи «Кьарнийир» комп-лексдиъ июлин вазлихъан мина сентябрин гьацIазкьан акция давам гъабхьну.
«Аьзарлуйирихъди «уьру зонайиъ» ляхин гъапIу духтрарихьди рягьятвал гъадабгъуз гъитбан фикир сифте ич дадайин кIулиз гъафнийи. Ич дада Айзанат 45 йисан гъулан больницайиъ ляхин гъапIу кас ву. Дугъу, бязиган шубуб гъулан аьзарлу гъахьи агьалйир кьабул апIури, гьадрарин сагъламвалин гъаравлиъ ади чан зегьметнан рякъ ккадапIну. Узу кми-кмиди дугъ’ин улуркьуз гъюри шуйза, хъа гьаму ражари гъафиган, дадайин кIвак гъалабулугъвал кайивал гъябкънийзуз, думу, телевизориз лигури, лап пашманди дуснайи. Гьерхуб-хъерхуб апIбан кьяляхъ, дадайи чан юкIв ачухъ гъапIнийи: «Учвхьан шулуш, гьаму ихь духтрариз кюмек апIинай. Гьаму читин аьгьвалатнаъ варитIан гъагъ алабхънайидар духтрар ву. Учвуз сагъламвал за апIру комплекс ачвуз, учвхьан удукьуруш, гьаму духтрариз рягьятвал гъадабгъуз мумкинвал абгай», – гъапнийи дадайи. Чуччухъдира гафар дапIну, духтрарин реабилитация гъабхру «Духтрариз аферин» кIуру акция гъабхбан къарар адабгъунча. Му май вазлин аьхир вуйи. Июлин вазлихъан мина проект уьмриз кечирмиш апIуз хъюгъюнча»,
– къайд гъапIнийи Мягьямед Мягьямедовди.
Республикайин гьюкми му акцияйин тереф фици гъюбх-нуш, РД-йин Главайин ва Правительствойин админист-рацияйин вакил, рягьимлувалин «Духтрариз аферин» акция ккабалгу Аьлибег Аьлиевди ктибтнийи: «Ихь республикайин ругариин гьаму жюрейин рягьимлувалин акция кIули гъябгъюрайивал Мягьямед Мягьямедовдин ва дугъан хизандин хъуркьувал ву. Вари дюн’яйиъ COVID-19-диз аькси вакцина, дарман абгура. Хъа думу уьзрихъди вуйи женгнан сабпи жергйириъ дийигънайи, вазариинди хулариз дурушри, больницайиъ йишвар-йигъар адаурайи духтрарикан фикир апIрудар гизаф гъахьундар. Духтрарин ляхниз лайикьлу кьимат тувбан бадали, коронавирус ухьухьна хъубкьну ккундийи. Республикайин Глава Владимир Васильевди проектдин тереф гъюбхну. Комплексдиз медицинайин идарайин кIулиъ айирин тек-лифниинди гьаъри, медицинайин гъуллугъчйири 60-80 касдикан ибарат вуйи дестйириинди рягьятвал гъадабгъури гъахьну. Акцияйин дахилнаъди мушваъ, уьлкейин жара регионариан вуйи духтрарра кади, 600-диинакьан касди рягьятвал гъадабгъну. Комплексдиъ деврин тIалабариз гъилигу технологйири ляхин апIура, уьмрин сагъу рякъяр хъаъруси ляхин ккабалгна», – гъапнийи Аьлибег Аьлиевди.
Каспий гьюлин гъирагъдихъ рягьятвал гъадабгъбалан савайи, «Кьарнийир» НОК-диъ духтрарин аьхю конференцияра кIули гъубш- ну. Комплексдиз дуфнайидар ктарди, конференцияйин ляхниъ онлайн къайдайиинди гизаф йишвариан духтрар иштирак гъахьну. Душваъ духтрари коронавирусдихъди женг гъабхбахъди аьлакьалу сагъламвалин, коронавирусдиан аьзарлу гъахьидарин реабилитация гъабхбан месэлйир гьял гъапIну.
Гьамус «Кьарнийир» комплексдиз, духтрарин реабилитация гъабхувал ккун апIури, уьлкейин гизаф регионариан илтIикIура. Дагъустандин ва Кафари Кавказдин медицинайин идарйириан вуйи духтрар ктарди, мина Белоруссияйиан, Австрияйиан, США-йиан, Израилиан, Украинайиан духт-рари чпин сагъламвал къайдайиз хуз гъюз ккуниваликан къайд апIура. Хъа рягьимлувалин акция сар-кьюр касдихьан гьаммишан гъабхуз шлу ляхин дар. Гьаддиз «Дагъустан» РИА-йин директор Мягьямед Мягьямедов гъябгъюрайи пресс-конференцияйин аьхириъ республикайин гьюкмарихьна, меценатарихьна, бизнесдин вакиларихьна, читин вахтна чпин игит зегьметниинди ихь ватанагьлийирин уьмрар гъюрхю лизи халатар хъайи инсанарин гьюрмат уьбхюри, гьаму проект давам апIуз кюмек тувувал ккун апIури илтIикIнийи.
