Сентябрин 20-пи йигъан Москвайиъ миржибпи ражари марафон кIули гъубшну. Марафондин дахилнаъди жаргъувалин талитнаъ иштирак хьуз 25 агъзуртIан артухъ агьалйир гъафну.

 

2019-пи йисандин му жюрейин марафондин иштиракчйирин сан-гьисаб хъана артухъ вуйи. Хъа гьамусяаьт коронавирусдихъди айи аьгьвалатназ лигну, талитарин иштиракчйирин кьадар цIиб гъабхьнийи. Харижи уьлкйириан вуйи иштиракчйирихьан марафондиъ иштирак хьуз гъабхьундар.

Марафон, коронавирусдин инфекция тарабгъувализ аькси къайдйир тамам апIури, кIули гъубхну. Дидин тешкилатчйири жаргъурайидарин хатIасузвал уьбхбан вари уьлчмйир кьабул дапIнайи.

Саб вазна гьацI улихьна, Москвайиъ 21,1 километр манзилназ дажаргъну, полумарафондиъ иштирак гъахьи Табасаран райондин Гюгьрягъ гъул’ан вуйи чвйир – Шихяли, Ямиль ва Аслан Гьяжиагъаевар (шиклиъ) Москвайиъ 42,2 километр манзилназ жаргъбан марафондиъра иштирак гъахьну. Гъардшар сагъу уьмур хъапIбан серенжемариъ иштирак хьуз гьарган гьязур ву, ва дурар гьамдиин дийигъну гъузбанди дар. Мидин гьякьнаан «Табасарандин нурар» газатдин редакцияйиз чпи гъардшари мялумат тувну.

Аслан Гьяжиагъаевдикан газатдин машариъ январин вазлира мялуматар тувнийча. Ихь ватанагьли дюн’яйин варитIан ягъал кIакIар – Килиманджаро, Эльбрус, Аконкагуа – мютIюгъ гъапIу, думу кIакIариина Дагъустандин пайдагъ хьади гъушу альпинистра ву.