Чвлин вахтна аьхю микIар хъивубси, кьюрдну аязар утIурччвубси, ихь кьюбиб районарин агьалйирра аквнахъ мюгьтаж шулу. Хъа саспиган мани фаслариъра аквар сабпну хътатIуру, ва гьаму аьгьвалат – гьяфтайиъ 4-5 йигъан кьюб-шубуб сяаьтназ муштарйирин ужагъар мучIушнаъ итувал – аьдатназ илтIибкIуру. Мициб гьялну, гьелбетки, агьалйириз гизаф манигъ’валар апIуру. Хъа бязи вахтари сабпну симариъ айи токнан кьувват лап ис абхъну, хъасин хабарсузди думу айи къайдайиз гъафиган, инсанарин токриинди лихурайи авадлугъар – телефизорар, холодильникар, ккуртар урччру машинар ва гь.ж. ургуру. Табасаран РЭС-диз аьрза хьади илтIикIиган, тахсир кьюбиб районарин акварин мяишатдин гъурулуш йирси дубхьнайивалиин алапIуру.
Табасаран райондиъ айи ич мухбир Ражаб Нуровди улихьна йигъари, зиихъ къайд дапIнайи месэлйир арайиан адагъбан бадали фициб ляхин гъабхураш аьгъю апIбан метлеб ади, Табасаран РЭС-дин жавабдар гъуллугъчйирихъди сюгьбат гъубхну. Идарайин кIулин инженер Низами Мирзабеговди дугъаз чпин мяишат чвлинна кьюрдун аьхъю вахтнахьна фици гьязур шулаш ва ляхниъ фицдар дигиш’валар шулуш, ктибтну.
Сюгьбатнаъ Низами Мир-забеговди къайд гъапIганси, Дагъустан Республикайин электросетарин комплекс-дин ижмишин за апIбан бадали, вари Дагъустандиъ айи электросетарин гъурулушар рас апIбан йирхьуд йисаз вуйи планар гьязур дапIна. Гьадму программайиинди Табасаран ва Хив районариъ 15000 муштарийин игьтияжар гьуркIрайи Табасаран РЭС-диъ 2019-пи йисан декабрин вазлихъан мина рас апIбан ляхнарихъ хъюгъна. Гьаци, 10 кВ напряжение айи, гьавайиъди дизигнайи линияйихъди вуйи «Сиртич» подстанцияйин 1,2,4-пи нумрайин фидерар, «ЦIанак» подстанцияйин 1,6-пи нумрайин фидерар, «Ярса» подстанцияйин 3-пи нумрайин фидер, гьацира 2020-пи йисан 24 трансформаторин подстанцйир (КТП) дибдиан рас гъапIну, дидланра савайи, 820 буруз, 19 КТП гьюдюхну ва 5 цIийи трансформатор дивну, 5-сана трансформатор дибдиан рас гъапIну.
«Гьясил апIбан программайиинди электросетарин комплексар ижми апIбан бадали, Дагъустан Республикайин «Россети» ДЗО ПАО-йихъди 2020-пи йисан Хянягъ ва Къужник гъулариъ 32,1 километр гьавайиъди дизигнайи, 0,4-10 кВ напряжение айи линия ва 4 КТП дибдиан рас апIуз, гьацира «Хючна» подстанцияйин 5-пи нумрайин фидер ва ТIивак гъулаъ 2,4 километр акварин линия изоляция али электрикдин симрахъди гьюдюхюз планар йитIна.
Акварин гьял ужу апIбан бадали, Шилла, Мягьрягъ, ЦIанак, Дарвагъ гъуларин советарин администрацйирин ва агьалйирин кюмекниинди бязи гъулариъ хъана артухъ трансформаторарин пунктар дивна. Гьамус ЦIурутIил гъулаъра трансформаторин пункт дивуз гьязурлугар гъягъюра. 2020-пи йис ктабхъайиз Куркакк – ТIюрягъ гьавайиъди гъябгъюрайи 10 кВ-йин акварихъди тяйин апIурайи 5-пи нумрайин фидер дибдиан рас апIувалра планламиш дапIна. Хив райондиъ айи 4-пи нумрайин фидер 68 километрин манзилнаъ дибдиан рас дапIна. Мажгвул гъулаъ айи трансформаторра капитально рас апIбанди ву.
Табасаран РЭС-диъ элект-рикдин гъурулуш рас апIру шубуб бригада лихура. Дурари гьаммишан трансформаторарихъ хъайи ягъ гьюдюхюра, гьацира акварин гуж фукьан аш, лигура», – ктибтнийи РЭС-дин вакили.
Ич мухбирин сюгьбатчийин гафариинди, Табасаран РЭС-дин материалинна техникайин тяминвалра ужу шула. 2019-пи йисан му идарайиз УАЗ машин тувну, хъа 2020-пи йисан сабпи гьацIаъ, Дагъустан Республикайиъ электросетевой мяишатарин арайиъ ляхнин натижйириан сабпи йишв гъадабгъбаз лигну, Renault Duster ва Renault Logan машинар тувну.
«Гьамусяаьт Дагъустан Республикайиъ «Россети» АО-йин инвестицйирин прог-раммайиинди энергетикайин гъурулушдин инфраструктура цIийи алапIувал лап яркьуди гъябгъюра. Табасаран райондин кIулиъ айидарин тIалабниинди, Табасаран РЭС-дин ляхин цIийи кIултIан гъурмиш апIбан бадали, 2019-2023-пи йисариз проектар гьязур дапIна», – гъапнийи Низами Мирзабеговди.
Табасаран ва Хив районарин гъуларин советарин ва инсанарин илтIикIбариз асас вуди, варитIан важиблу месэлйирси кьюб гьисаб апIуз шулу – электрикдин сетариъ гьубкIну напряжение адрувал ва пландихъди дарди аквар ктIушвувал. Низами Мирзабеговдин гафариинди, Табасаран РЭС-дин инфраструктура цIийи алапIбан ва дибдиан рас апIбан асас метлеб – агьалйирин акварихъди вуйи тяминвал мюгькам апIувал ву. Хъа пландихъди дарди аквар ктIушвувал электрикдин сетар лап йирси духьнайивалихъди алакьалу ву, аьхюну пай токдин акварин симар 1966-1967-пи йисари дизигнайидар ву. Гизафси му терефнаан читинвалар Хючна гъулан электроподстанцияйин 5-пи нумрайин фидерихъан аквар дизигнайи гъулариз алахьура. Гьадму линияйик Хючна-Жулжагъ-Къужник гъулариан вуйи аквнан 7000 муштарйир кахьра.
Расвалин ляхнар гъапIган, аквнан аьрзйир хьади газатдин редакцияйиз илтIикIру ихь районарин агьалйирин кьадар цIиб шул кIури, умуд кивдихьа.
