Улихьна йисариси дарди, гьамус гъулариъра кмиди зирзибил, жюрбежюр хъархъас гизаф уч шула. Эгер сабишв’инди гъадабгъуруш, райондин аьтрафариин му месэла гьял апIувал лап читинди алабхъура.

 

Хъа ихь абйирин гьамциб айту а: «Марццишин гьаммишан марцц апIру йишваъ ваъ, хъа гъапIу марццишин уьбхру йишваъ шулу». Дугъриданра, эгер ухьу гьарсари жвуван хизандиъ уч гъабхьи хъархъас минди-тинди гатIабхьувал цIиб гъапIиш, ясана думу зирзибил лазим вуйи йишвахьна шишлиъ абхьну гъабхури гъабхьиш, машин гъябгъюрайи вахтна унчIв’ан тина рякъюн гъирагъдихъинди ухьуз лазим дару мутму гатIабхьувал дебккиш, ихь табиаьт мукьан чиркин хьибдайи.

Сентябрин 19-пи йигъан Табасаран райондин ЧвулатI гъулаъ табиаьтдин марццивал уьбхбан акция кIули гъубшну. Думу тешкил гъапIдар ЧвулатI гъулан собраниейин депутатар вуйи. Гъулан аьтрафар марцц апIбан ляхниъ аьзарлу бицIидариз кюмек тувбан рягьимлувалин «Уж’вал апIури, манишин тув» фонднан президент Александр Бекин, ЧвулатI гъулан главайин гъуллугъниина кандидат вуйи Герейхан Мирзаханов, гъулан агьалйир иштирак гъахьнийи. Акцияйин тешкилатчйири гьаму жюрейин серенжемар вазлин арайиъ саб ражари гъахувал аьдатнаъ ипбанди ву.

Марццишин – му сагъламвалин асас пай ву. Гъи ухьу, аьхюдари, гьаму ляхин апIури бицIидарра вердиш гъапIиш, гележегдиъ ихь веледарра табиаьтдин марццишнан гъаразнаъ хьиди.