Байвахтнан тIяъмар…
Гъулан исикк ккайи багъдиъ дигмиш духьнайи элвен ва лизишин гъидикьнайи вичарин, кьацI гъивиган, силбариккан гьар терефназди ккутIубччвру учIврушинна меълишин гъибикьнайи ширейин дад!
Дадайи дирник гъубжу, дюн’яйиъ саб шейънахьдира тевуз даршлу ицци ниъ тарабгъурайи гъюдли уьлиин алапIнайи таза кIамуйин тIяаьм…
Хьадан вахтна хярариъ вая чIурариъ цIиин иливну, рукьан ичIи кьутдиъ жвилли шекер кабхьнайи булагъдин марцци штук бегьемди хъуркьну адру алчйир вая чIуру худар дурхьну, гьязур гъапIу, учIврушин хъайи, амма йиччвтIан меълибси гьибгъру «кьутIкьулутIай»…
Дадайи машквранган никкдихъди аьляхъну гьязур апIру, ушвниъ ччимси ерцIру дюгдин вая варждин назук галар, гъалин ниъ деебтру, мелзниин иливган, гъизилин тики алиганси, гъагъ гьисс апIуз гъитру мехек пIенк…
Жвуван нубат вуди гъулан лижахъ хъайи вахтна лисундин чIив гьибтуз цIин аржлигъ дубжнайи, гъургу гакIвларин ритнари кIару дапIнайи гъицибкъу гал гаркIлихьди алцабхну, кьюб йишваз пай гъапIу картуф – бугъ гъюрайи, удар-ударди ктабхьурайи, тIубариз «уф» апIури, убцури имиди ушвниз гьапIрайи ниъмат.
Яраб, аьламдиъ мурартIан ицци шей’ар шуйкIан?!
Ихь байвахтнакан хабар туврайи му чархачйир, душв’антина гъийин ихь уьмриз гьачIарккнайи уьмрин жюрбежюр вахтар сатIи апIурайи симар гьаз ухьуз мукьан багьа вуйкIан?
Белки, му инсандин къанажагъдиз хас вуйи лишнин тахсир вушул – ухьу ккудубшуб, улдубчIвуб варитIан ужубсиб, утканубсиб заан уьлчмейинубси гьисаб апIури шулхьа. Хъа, мумкин ву, вахтну гьаргандиз гъуху думу ярхла ва набалугъ йисар ва шаду гьиссар кьяляхъ апIуз даршлували дурарин гьяйбатлувал, кIваз хуш’вал артухъ апIурайхьиб? Белки, бицIидиган ухьу итIру сурсатарин кIваълан дурубшру дадну ихь багърум гьаму жюрейиинди абгрувал – дурар цIибдитIан адрувалихъди ясана дурар ухьуз думуган къадагъа дапIну айивалихъди аьлакьалу вушул? Ясана думу тIяъмарин заан кьиматлувал дурари ухьуз гьар йигъандин уьмриъ гьудруркIрайи, ухьу бахтлу хьпан бадали чарасуз лазим вуйи, хуррам геренар кIваин хьуз гъитрайивалин гьиссариъ ашул?..
Байвахтна ухьу уьмур тамамди – жюрбежюр гьядисйир, ляхнар, гьиссар, фикрар чиб-чпихьан жара дарапIди, битавди – аннамиш апIурухьа. Гьаддиз думуган гъитIу шей’арин тIяъмарра, гъи саб яшназ дуфнайи ва гьадму байвахтнан тамамвалихъ мягьрум духьнайи ухьу, бахтлу вахтнан уьмрин гъудубгу битаввалин саб тикиси гьисаб апIурашул, ва гьаддиз думу ухьуз мукьан багьади вушул?!
Амма, аьхю духьну, йигъар-йисариинди абгури-абгури, аьхирки гъибихъу, дадмиш гъапIу гьадму тIяъми ухьуз гьаз-вуш, байвахт-насиб шадвал, хушбахтвал тувудар ясана думу дад жарасиб, улихьгандинубдиз ухшар даруб вуди шулу…
Гьарсаб шейъназ чан вахт ва тIяаьм а, гьадму гьисабнаан бахтназра.
