Гьаму йигъари Урусатдин заан технологйирин медицинайин дармнар, лабораторияйин авадлугъар ва медицинайин техника гьязур ва гьясил апIурайи ва масу туврайи «Р-Фарм» компанияйи СOVID-19 вирус сагъ апIру «Коронавир» дарман арайиз дубхнайиваликан ва дидин 50 дарман айи саб упаковка аптекйириъ 11 550 манатдихъ масу гъадабгъуз шлуваликан мялумат тувну.
Мидланра гъайри, 21-пи сентябриъ уьлкейин аптекйириъ коронавирусдиз аькси «Арепливир» дарманра масу туврайиваликан мялуматар айи. Му дармнин кьимат 12 320 манат ву.
ТАСС-дихъди вуйи сюгьбатнаъ дармнар гьязур апIру «Промомед» компанияйин генеральный директор Андрей Младенцевди къайд гъапIганси, «Арепливир» дармнихъди вари уьлкейин аптекйир саб дупну тямин апIуз хьибдар. Багахь гележегдиъ думу аьхю шагьрарин аптек-йириъ масу тувуз хъюгъди.
Ухьуз рябкъюрайиганси, коронавирус сагъ апIру кьюб дарман ихь уьлкейиъ гьязур гъапIну. Урусатдин сагъламвал уьбхбан Министерствойи думу дармнарин кюмекниинди COVID-19 вирус амбулаторияйин къайдайиинди сагъ апIуз ихтияр тувна. Улихьди «Арепливир» ва «Коронавир» дармнар анжагъ больницйириътIан ишлетмиш апIуз ихтияр адайи. Гьамус думу дармнар духтрин рецептдиинди аптекйириан масу гъадагъуз мумкинвал а.
Больницйиризра «Арепливир» дарман гьадму кьиматназ масу гъадабгъура. Му цIийиди адабгънайи дарман ву ва гьелелиг ужуз кьиматназ масу тувуз шулдар, фицики думу бицIи вахтнан арайиъ гизаф харжар удучIвну арайиз гъабхи ва уьзур ухди кьяляхъ йивру дарманси гьисаб дапIна.
«Промомед» фармацевтикайин компанияйин директорарин советдин председатель Петр Белыйдин гафариинди, аьзарлу сад йигъан стационариъ сагъ апIбан курсдиз кьялан гьисабариинди 70-200 агъзур манатдин харжар удучIвура. Думу кьиматарихь тевиган, цIийи дармнарин кьиматар багьалудар дар. Мисалназ, коронавирус кайи аьзарлуйиз йивру «Актерма» рубдин кьимат 40 агъзур манат ву. Урусатдин цIийи дармнарин кьиматар 11-12 агъзур ву, амма дурари иццру гъахьир сагъ апIуру, думу больницайиъ ккаъбан чарасузвал хьибдар.
ЦIийи дармнар тартиб апIбахъди сабси, ихь уьлкейин фармацевтикайин компанйир коронавирусдиз аькси вакцина арайиз хувалиинра жанлуди лихурайи. Натижйири ккилигуз гъитундар. Магьа гьаму йигъари Урусатдин Президент Владимир Путинди ООН-дин Генассамблеяйиъ COVID-19 коронавирусдиз аьксиди Урусатдиъ «Спутник V» вакцина арайиз дубхнайиваликан ктибтну. Президентди Урусатдиъ тартиб гъапIу вакцинайи чан мянфяаьтлувал, хатIасузвал ва мумкинвалар тасдикь гъапIуваликан гъапну ва ООН-дин вакилариз думу вакцина пулсузди йивуз теклиф гъапIну. Владимир Путинди Урусатдин гьюкумат коронавирусдиз аькси вакцина арайиз хпаъ вари гьюкуматарихъди аьлакьйир уьрхюз, кюмек тувуз ва тажрубайихъди таниш апIуз гьязур вуйиваликанра гъапнийи. Вакцина Урусатдин регионариз бицIи партйириинди хътапIура. Дидин сабпи партия (42 доза) гьаму йигъари Дагъустандизра гъурубкьну.
РД-йин сагъламвал уьбх-бан министр Жамалудин Гьяжиибрагьимовдин гафариинди, му партия сабпи нубатнаъди медицинайин вакилари ишлетмиш апIиди, фицики вирус тарабгъбаъ варитIан аьхю хатIа гьадрариз а. Багахь гележегдиъ вакцинайин дозйир хъана хиди. «Вакцина цIийиб ву, думу улихьна йигъари арайиз гъабхну, гьаддиз дозйирин кьадар гьеле цIибтIан дар. Учу думу вакцина сабпи нубатнаъди йивну ккуни инсанариз ишлетмиш апIуз мумкинвалар агидича», – гъапну министри.
Къайд апIуб лазим вуки, вакцинайин руб гьарсар касдиз дугъан разивалииндитIан йивудар.
