Фунуб халкьдизра культурайин центр важиблу идарйирикан гьисаб шула. Табасаран райондин меркездиъ ерлешмиш дубхьнайи культурайинна рягьятвал гъадабгъру центр гьацI аьсиртIан артухъ вахтна культурайин вари терефариан райондин асас майдан вуйи. Центриъ студйир ва халкьдин театр айи, кинофильмар улупуйи, дидин сягьнайиин табасаран ва дагъустандин жара миллетарин хайлин машгьур артистари ва яратмиш апIбан коллективари чпин бажаранвал улупури шуйи. Му дарамат швнуб-саб наслин вакилариз чпин удукьувалар артмиш апIуз ва Дагъустандин аьхю сягьнайиина гъягъюз мумкинвал туву майдан вуди гъабхьну.
Табасаран райондин культурайин центри гъийин йигъанра райондиъ культурайин цирклиан кIули гъягъру вари серенжемариъ важиблу роль уйнамиш апIура. Сад йисандин арайиъ мушваъ 20-тIан артухъ жюрбежюр серенжемар тешкил апIури шулу. Му идарайи гъабхурайи ляхникан, коллективдин улихь дивнайи планарикан учуз центрин директор Аьбдулвагьаб Аьбдуловди ктибтнийи.
Дугъан гафариинди, центриъ 31 гъуллугъчи лихура. Республикайин, Урусатдин важиблу машкврариъ, гьацира райондин, диндин цирклиан вуйи, РД-йин культурайин Министерствойин ва Республикайин халкьдин яратмишарин хулан тешкиллувалиинди кIули гъахру милли аьдатарин серенжемариъ, мажлисариъ, фестивалариъ, конкурсариъ Табасаран райондин коллективар жанлуди иштирак шула.
«Уьлкейиъ тарабгънайи тIягъвнихъди аьлакьалу вуди, Урусатдин культурайин министри культурайин вари ужагъари махлукьатлу серенжемар тешкил дарапIбан гьякьнаан къарар адабгънийи. Амма думу вахтна центрин вакилари, онлайн къайдайиинди лихури, чпин улихь хьайи вазифйир тамам апIувал дебккундайи. Аьхиримжи вахтна ич центрин хайлин гъуллугъчйир заан идарйирин дипломариинди, гьюрматнан грамотйириинди лишанлу дапIна. Саб-кьюб ваз мидиз улихьна дагъустан эстрадайин артист, центрин дахилнаъ айи «Табасаран» вокалинна мукьмар йивру алатарин ансамблин мяълийир апIру Гюльназ Гьяжикъурбанова «Дагъустан Республикайин лайикьлу артист» ччвур тувбиинди лишанлу гъапIну. Культурайин центрин вакил Исабег Наврузовдиз РД-йин культурайин Министерствойиан Дагъустан Республикайин Гьюрматнан грамота тувну.
Пуз ккундузузки, гьар йисан ихь республикайиъ ООН-дин лишниккди, РД-йин Главайин ва РФ-дин культурайин министрин иштирак’валиинди «Дагълуйир» кIуру фестиваль гъабхура. Гъубшу йисан Табасаран райондиз думу фестивалин иштиракчйир, Карачаево-Черкесияйин халкьдин яратмиш апIбан коллектив чпин устадвал улупуз гъафнийи. Гьаму йисан думу фестиваль Мягьячгъала шагьриъ, “Урусат – йиз тарих” музейиъ гъабхьну. Табасаран райондин коллектив ццира гьадму фестивалиъ иштирак хьуз гъубшну. Учу ихь халкьдин кюгьне аьдатарикан вуйи мархьлиз дих апIбан, цIийи швушв булагъдиккна хъади гъягъбан, ушвурукар ва гьацира ихь жара аьдатарин фольклорин сягьнйир гьязур дапIнача ва дурар республикайин жюрбежюр серенжемариъ улупурача. Думу сягьнйир гьязур апIайиз улихьна хайлин агъсакъларихьна, агьли дишагьлийирихьна илтIикIнийча. Дурариз учухьна центриз гъюбан теклифар апIури, аьдатарикан гьерхри, учу сягьнйириъ деетурайи гъалатIариз фикир тувуб ккун апIури гъахьнийча. Думу сягьнйир «Шарвили», «ЦIамаури», «Дагълуйир», «Эбелцан» ва вари халкьарин жара фестивалариъ улупунча. Цци арайиз дуфнайи ва ухькан асиллу дару себебариан райондин яратмиш апIбан коллективарихьан гизаф серенжемариъ иштирак хьуз гъабхьундар. Хъа, гьяйиф», – гъапну Аьбдулвагьаб Аьбдуловди.
Йиз сюгьбатчийи къайд гъапIганси, райондин глава Мягьямед Къурбановдин жягьтлувалиинди гъюру йисан гьадму саб вахтна аьдатнаъ ади гъабхьи «Рубасдин мукьмар» фестиваль таза алапIуз планламиш дапIнача. Мягьямед Къурбановди райондиъ культурайин цирклиъ ляхин апIурайи гъуллугъчйириз му месэлайин зиин лихуб табшурмиш гъапIну. Гъюру йис саб жюрейинра гъагъи тIягъвнари пуч дарапIиш, ухьуз Хючнаъ Рубасдин мукьмар цIийикIултIан ерхьур кIури, миж кивурхьа.
