Дербент шагьрин кюгьне терефнаъ ерлешмиш дубхьнайи Жвумийин мистан гьяятдиъ аьхю шулайи платандин гьар «2020-пи йисандин Урусатдин гьар» милли конкурсдиъ гъалиб гъабхьну. Мидин гьякьнаан Дагъустандин ярквран мяишатдин комитетдиан мялумат тувра.

 

«Гьар йисан кIули гъябгъру «Йисандин Европайин гьар» вари халкьарин конкурсдиз гьар гъядябгъру милли конкурсдин 2020-пи йисан гъубшу «Урусатдин йисандин гьар» пайнаъ Дербентдин Жвумийин мистан гьяятдиъ аьхю шулайи платандин гьариз гъалибвал тувди, натижйир сабпи октябриъ йивбанди ву. Думу гьарихъанди 39082 касди чпин сесер тувну»,

– дупна мялуматнаъ.

Платан гьарин яш 285 йистIан артухъ ву. 2012-пи йисандин улупбариинди, гьарин ягълишин 35 метр, хъа кьаблин ацIушин 1 метрна 76 сантиметр ву.

Дербентдин агьалйирин гафариинди, Жвумийин мистан гьяятдиъ платандин гьарар 9-пи аьсриъ машгьур аьлим, шариаьтдин ва тарикьатдин имам Абул-Кьасим аль-Жунайид аль Багъдадийи кивдар ву. Гьарар кивбан метлеб — мист табиаьтдин хатIалу дюшюшарихьан уьбхювал вуйи, платандин гьарари мист дабгъувалихьан уьбхюра. Гьарари жилиъ айи ламушин адабгъуру, гьаддиз мистаъ ламушин адар.

Кьюбпи йишваз, 25720 сес уч дапIну, «Чувашияйин мяхъюн яркврарин аьхюр» лайикь дубхьна, хъа шубубпи йишваз, 11260 сес уч дапIну, Брянск областдин «Партизнарин мяхъв» кIуру гьар лайикь гъабхьну.

2020-пи йисан майин 1-пи йигълан октябрин 1-пи йигъазкьан уьлкейин варитIан машгьур гьарихъанди «Гьарар – табиаьтдин чIиви ядиграр» вари Урусатдин программайин сайтдиъ сесер тувуз шулайи. Уьлкейин варитIан машгьур 12 тарихи гьарарихъан сесер тувуз вари Урусатдин сертификатар тувру комиссияйи къарар адабгънийи.

РД-йин ярквран мяишатдин комитетдиан мялум гъапIганси, гьарарин экспертизйир гъахру Центрин экспертари гъалиб гъабхьи гьарин ахтармишар ва гьар сагъ апIбан серенжемар гъахуз сертификат тувди. Гьаму йисан гъалиб гъабхьи гьар 2021-пи йисан вари халкьарин арайиъ гъябгъру конкурсдиъ Урусатдин терефнаан иштирак хьибди.