Улихьна йигъари Табасаран райондин главайин кабинетдиъ чвлин призывдиз бахш дапIнайи совещание кIули гъубшну. Табасаран райондин военный комиссар Садикь Мурадялиевдин гафариинди, Табасаран райондиъ чвлин призыв 12-пи октябриъ ккебгъди. Чвлин вари призывдин вахтна Урусатдин Яракьлу кьувватарин жергйириз гъадагъру жигьил эскрарин кьадар 50 касдихьна хьибди. Сабпи ражну 12-пи октябриъ 7 жигьил эскрарикан ибарат вуйи десте рякъюъ убчIвди.

 

 

«Дюн’яйиъ коронавирусдин уьзур тарабгъбахъди аьлакьалу вуди, ццийин йисан жигьилар Урусатдин Яракьлу кьувватарин гъуллугъназ гъадагъбан вахт гьюдюхну. Гьамусяаьт варитIан важиблу месэла – коронавирус тарарабгъбан, думу призывникарик ва военкоматариъ айи гъуллугъчйирик ктрубчIвбан бадали, лазим вуйи уьлчмйир кьабул апIувал ву. Гьадму ляхнар кIулиз адагъбан метлеб ади, призывдин пунктар инсандик ктруркIди дугъан бедендин температура аьгъю апIру термометрарихъди, бактерйир терг апIру кварцдин лампйирихъди, тест-гъурулушарихъди, медицинайин маскйирихъди, гьава ва кабинетар микробарихьан зегьерсуз апIру шей’арихъди тямин дапIна.

Жигьилар призывдин пунктдиз, дурар гъахру машинарин дезинфекция дапIну, хъасин гъахиди. Дурариз лазим вуйи вари шей’ар тувди: ипIруб, ккуртар, кIул’инди электрондин картйир ва гьаци жара шей’ар», – къайд гъапIнийи Садикь Мурадялиевди.

Чвлин призыв 1-пи октябриан 31-пи декабризкьан кIули гъябгъиди.

Совещаниейин аьхириъ Табасаран райондин глава Мягьямед Къурбановди, жигьил эскрар рякъюъ тIаъбан бадали, фицдар гьял апIуз даршлу месэлйир аш ктибтуб ккун гъапIнийи. Гъулариъ айи советари жигьилар армияйиз гъягъюз фтикIа манигъ’вал тувраш, ктибтуб ккун гъапIнийи. Райондин главайи Садикь Мурадялиевдикан, армияйиз гъягъюрайи жигьил эскрариз лазим вуйи вари шей’ар масу гъадагъну, чантйириъ ивну, дурар рякъюъ тIауб тIалаб гъапIну. Духтрарра думу жигьиларин сагъламвализ лап дикъатлуди лигура. 12-пи октябриъ жигьилар армияйиз гьаъбан сабпи серенжем кIули гъябгъиди.