Гьаму йисандин чвлин вахтна Дагъустандиан дявдин гъуллугъназ 3500-тIан артухъ жигьилар гъягъиди. Дидин гьякьнаан журналистариз чвлин призывдиз бахш дапIнайи конференцияйиъ Дагъустан Республикайин дявдин комиссар Даитбег Мустафаевди мялум гъапIну.
РД-йин дявдин комиссарин гафариинди, РФ-дин ВС-йин Генштабди Урусатдин 128000 ватандашдиз дявдин гъуллугъназ дих апIбан месэла улихь дивна. Къайд апIувал лазим вуки, гъубшу йисандин чвлин призывдин улупбарихь тевиган, гьаму чвну республикайиан эскервалин гъуллугъназ гьаърайидарин кьадар артухъ дубхьна. 2019-пи йисан аьхириъ республикайиан Яракьлу кьувватарин жергйириз 3075 жигьил гьаънийи.
«1-пи октябрилан башламиш дапIну, Урусатдин аьтрафариин дявдин гъуллугъназ жигьилар гъахбан чвлин призыв ккебгъну. Дагъустандин призывдин комиссйириз 60 агъзуриинакьан касдиз дих апIиди. Дурарикан фуж гъуллугъназ гьаъруш, фуж дявдин эскервалин буржийихьан азад апIуруш, шлиз цIибди вахт тувруш къарар адабгъиди», – гъапну Даитбег Мустафаевди.
Военкомдин гафариинди, уьлкейиъ COVID-19 тарабгъувалихъди арайиз дуфнайи аьгьвалатназ дилигну, призывдин пунктариъ ва жигьилари гъуллугъ апIру йишвариъ коронавирусдин инфекция тарабгъувализ аькси серенжемар кIули гъахура.
«Призывдиз дих дапIнайи вари ватандашар сагъламвал уьбхбан хусуси алатарихъди тямин апIиди. Хъа РФ-дин Яракьлу кьувватарин жергйириз гьаърайидари аьлава вуди коронавирусдин инфекция кайивал аьгъю апIру тестар тувди. Гъийин йигъаз респуб-ликайин армияйиз гъягъру жигьилар уч апIру пунктдиъ дурар чпи гъуллугъ апIру йи-швариина хъуркьайизкьан лазим вуйи вари алатарихъди тямин апIуз мумкинвал а, машниин алахьру маскйир гьар кьюб сяаьтнак дигиш апIруси пай апIиди», – къайд гъапIну военкомди.
Дугъу гъапиганси, республикайиан вуйи призывникари Кьялан, Кьибла, Ригъ гьудубчIвру ва Ригъ алабхъру дявдин округариъ ва Кафари флотдиъ гъуллугъ апIиди. Гъуллугъ гъабхру вахт – 12 ваз – дигиш дубхьнадар.
РФ-дин оборонайин Министерствойин кIулиъ айидарин тIалабниинди, эскервалин гъуллугъназ гьаърайи ватандашар, дурарин багахьлуйир тахсиркарвалин гьяракатариъ иштирак хьувалин гьякьнаан ахтармиш апIиди. Заан образование, пишекарвалин кьялан образование айидар, Яракьлу Кьувватариъ лазим шлу пишйиран эйсйир – машин хъапIуз ихтияр айидар, фельдшерар сабпи нубатнаъди дявдин гъуллугъназ гъядягъиди.
Пресс-конференцияйиъ контрактдиинди дявдин гъуллугъназ гъягърударин месэлара за гъапIнийи. Даитбег Мустафаевди гъапиганси, 2020-пи йисандин аьхириз республикайин дявдин комиссариатди контрактдиинди дявдин гъуллугъназ 1200 кас гьаувал планламиш дапIна.
Мидланра савайи, 2020-пи йисан РД-йин дявдин комиссариатди мектебар ккудукIу жигьилар РФ-дин оборонайин Министерствойин урхбан идарйириз гьаъбан ляхинра гъубхну. Натижайиъ республика-йиан 300-тIан артухъ ватандашар дявдин урхбан идарйирин сабпи курсариз кьабул гъапIну.
Мидланра гъайри, Даитбег Мустафаевди къайд гъапIганси, республикайин дявдин комиссариатдиз айи хъуркьуваларихъди сабси, гъийин йигъаз Дагъустандиъ эскервалин гъуллугънаккан кIул ккадабгъурайи 2000-тIан артухъ жигьиларра а.
«Дупну ккундуки, къанун чIур апIували уголовный жавабдарвалихъна хуру. Дявдин гъуллугънаккан кIул ккадабгъурайи ватандашариз аькси вуди швнуб-сабан уголовный делойир гъитIирккну»,
– аьлава гъапIнийи Даитбег Мустафаевди.
