2020-пи йисан вари Урусатдин гьарарин арайиъ кIули гъубшу конкурсдиъ Дербент шагьрин мистан гъвалахъ хъайи чинарин гьар гъалиб хьувалихъди аьлакьалу вуди Дагъустандин ярквран мяишатдин Комитетди «Кюгьне чинар – тарихдин шагьид, мистан гъаравул» ччвур тувну, шиклар зигбан конкурс тешкил дапIна.

 

Конкурс ццийин йисан 15-пи октябриан 10-пи декабризкьан жюрбежюр яшар духьнайи бицIидарин 3 дестейин арайиъ кIули гъябгъиди:

бицIидарин десте – 6-9 йис;
кьялан яшарин десте 10-13 йис;
аьхюдарин десте 14-17 йис.

Ярквран мяишатдин Комитетдин пресс-гъуллугънаан учуз мялум гъапIганси, конкурсдиъ иштирак хьпан бадали улупнайи шартIар гьамцдар ву: А4 вая А3 кIажук шикил зигувал; табиаьтдин жюрбежюр рангар ишлетмиш апIури, чинарин гьар капIувал.

Учуз тувнайи мялуматариинди, саб чинарин гьар капIну гъибтну ккундар, гьаддихъди сабси гьадму гьарихъди аьлакьалу тарихдиканра кидибтну ккунду.

Шикил дизигнайи кIажун тмунуб терефназ думу гъизигурин фамилияна ччвур, яшар ва кIапIнайи шикликан бицIи мялумат тувуб лазим ву.

Конкурсдиъ иштирак хьуз каънайи шиклар, «конкурс» лишан иливну, почтайиъди республикайин ярквран мяишатдин Комитетдиз ясана конкурсдиъ иштираквал апIурайи кас яшамиш шулайи йишваъ айи мешебегийин мяишатдиз хътауб лазим ву.

Конкурсдиъ иштирак’вал апIуз улупнайи гьарсаб яшнан дестейиъ 1-пи, 2-пи ва 3-пи йишварин сагьиб гъахьидариз яркьуди тешкил дапIнайи серенжемдиъ гьюрматнан кагъзар ва багьалу пешкешар тувди ва дурари гъизигу шиклар «2021-пи йисандин Европайин гьар» конкурсдин натижйир йивру вахтназ Брюссель шагьриъ гъябгъру шадлугънан серенжемдиз хътаиди.