Травматология медицинайин цирклиъ варитIан кюгьне паярикан саб вуди гьисаб дапIна. Му пишейи травматолог духтрарикан рягьим, сабур, марцци юкIв, ачухъ фикрар, инсандин уьмур давам апIуз духтрикан асиллу шулайи далилар гьадму сяаьт йишв’ин гьял апIуз аьгъювал ва мюгькам хил ккун апIура.
Мидланра гъайри, травматолог кIван сикинвалиинди ва дирбаш’валиинди инсандиз кюмекназ гъюз фунуб вахтнара гьязурди ккунду. Гьаму вари лишнар ихь ватанагьли, жигьил травматолог-ортопед духтир Заур Ибрагьимовдиз хас ву.
Ибрагьимов Заур Агъамирзаевич Хючна гъулаъ бабкан гъахьну ва гьадушваъ мектеб ккудубкIну. Дугъан адаш Агъамирза Шамсудинович Хючна гъулан 1-пи нумрайин мектебдин завуч вуйи. Хъа дада Жюм’эханум Вейсовнайи гъира Хючна гъулан 1-пи нумрайин мектебдиъ дарсар кивра. Дурарин вари уьмур мектебдиъ гъубшну. Адашди химия ва биология киврайи (думу рягьматдиз гъушну, чан гунгьарин аьфу апIри), хъа дадайи – математика. Табасаран райондиъ дурарин хизандиз аьхю гьюрмат а, чпин ляхниъ дурар лайикьлу пишекрарси мялум вуйи.
Духтир хьуз Заури гьеле мектебдиъ урхури имиди кIваъ ниятар уьрхюри гъахьну. Думу чан гележег духтирвалихъди аьлакьалу шлубдин гъавриъ айи. Дупну ккундуки, биологияйин ва химияйин дарсарра дугъаз имбу дарсартIан артухъси маракьлудар вуйи. Духтрар кайи кинйир, дурарикан дидикIнайи китабар гьаммишан Заурин уларикк шуйи. Дугъаз духтрарин лизи халат али инсанари уж’вал хурайиси гьибгъуйи. Гьаци хьузра ву.
Хючна гъулан 1-пи нумрайин мектеб ккудубкIиган, Заур Мягьячгъала шагьриъ Дагъустандин гьюкуматдин медицинайин университетдик урхуз кучIвру, хъа дидин кьяляхъ Санкт-Петербург шагьриъ Гьюкуматдин травматологияйинна ортопедияйин илимдинна ахтармишарин институтдиъ урхуру. Санкт-Петербургдиъ урхурайи вахтна дугъаз Ленинградский областдин Токсово поселокдиъ ерлешмиш дубхьнайи ва чан дахилназ швнуб-саб район гъадагънайи асас больницайиъ лихуз теклиф апIуру. Думу больницайиъ травматологияйин отделениейиъ травматолог-ортопед духтирди лихури, Заурин магьа 6-пи йис гъябгъюра. Заури багъри ватандиз – Табасарандиз гъягъюзра вахт абгури шулу. Дагъустандиъ жигьил духтрихьна, насигьят вая теклиф ккун апIури, илтIикIрударра гизаф а.
«Ужур травматолог хьуз гъагъиди ву. Травматологдиз, практикаси, ляхнин ужуб тажрубара ади ккунду. Ялгъуз университетдин аьгъювалар ва пише гъадабгъну кIури, травматолог шлуб дар. Сад йигъан ич больницайин аьзарлуйир кьабул апIру отделениейиз, кюмек ккун апIури, асккан гьисаб 40 инсан илтIикIуру. Дурарин арайиъ цIа кабхъбан дюшюшариъ ахъдар, гьяйванатари кьацIар гъивдар, гизаф мертебйирин хулариан ахъдар, ликар, хилар, юкьян гьар гъюбгъдар, йивну иццру гъапIдар ва гьацдар жара зийнар гъахьи инсанар ади шулу. Хъа асас йишв рякъяриъ машинариъ гъахьи хатIалу дюшюшари бисура. ВаритIан гъагъи зийнарра гьадрариз духьнади шулу. Кьюрдун вахтна йиф, миркк айиган алдакну, иццру апIрударин арайиъ агьли касарин кьадар аьхюб ву, хъа хьадну, икибаштIан, ликариз сикинвал дибрихърайи бицIидар ва живанар абйир-бабари хьади гъюбан дюшюшар гизаф алахьуру. Йигъ-йишв дарпиди, травматологар инсанарин иццрушнарин жвар дебккбиин, зийнар сагъ апIбиин лихура. Ич больница деврин медицинайин цIийи алатарихъди тямин дапIна. Сад йигъан узу саки саб вая кьюб операцияйиъ иштирак шулаза. Аьхиримжи 10-15 йисан медицинайин цирклиъ травматология гужалди артмиш шула. Операцйир гъахру вахтна ишлетмиш апIру техникайин алатар ва хирургияйин технологйир бегьемди цIийи алаъну. Мидланра гъайри, гъагъи зиян гъабхьидар вая ликар-хилариз, юкьян гьариз ва жара йишвариз зийнар гъахьидар сагъ апIру цIийи къайдйир арайиз духна. Миди, икибаштIан, хирург-ортопеддин ляхниз хайлин ужудар мумкинвалар тувра. Гьамус учу лап гъагъи зийнар духьнайи ва гьадму саб вахтна сагъ апIуз саб мумкинвал ва чара дибрихъри гъахьи пациентаризра кюмек туврача. Бязи дюшюшариъ деврин ортопедияйинна хирургияйин кюмекниинди затра ришвуз даршулайи ликар-хилар сагъ апIуз мумкинвал гъабхьну»,
– кIура Заур Агъамирзаевичди.
Больницайин кIулиъ айидарин, духтрарин, аьзарлуйирин терефнаан Заурихьна аьхю гьюрмат а. Бязиган, дагъустандин вузарин дипломар Урусатдин шагьрариъ ляхниъ дийигъруган гьисабназ гъадагъудар кIури, ебхьури шулхьуз. Хъа Заури дагъустандин духтраризра заан дережайин пишекарвал айиб ва дурар гъудуркьу, чпин ляхниъ жавабдарвал ва ужудар мумкинвалар улупру духтрар вуйивалиин учв лихурайи больницайин вари духтрар ва Токсово поселокдин агьалйир инанмиш хьуз гъитну.
Заур чан хал-хизандихъди Токсово поселокдиъ яшамиш шула. Дурариз бай а. Думу гьеле бицIиди ими, хъа гьци вушра, Заури чан веледди духтирвалин пише ктабгърувалик миж кивра. Хъа гележегдиъ фици шулуш, чав уьмри улупиди.
