Гъубшу гьяфтайиъ Мягьячгъалайиъ айи «Дуствалин Хулан» конференцйир гъахру залиъ РД-йин милли политикайин ва диндин ляхнариз лигру Министерствойин дахилнаъ айи Дагъустан Республикайин бабан чIалар ахтармиш апIру Центри чапдиан адагънайи Марина Гьясановайин «Телесный код культуры в дагестанской паремиологической картине мира», Желил Самедовдин «Авар чIалнан кпикьу предложениейин синтаксисдин очеркар», Салминат Гьясановайин «Рукьушнарин махъвар» ва Сабрина Шихялиевайин «Г.Уьмаровайин чIал ва поэтика культурйирин арайиъ вуйи аьлакьйириъ» китабарин презентация гъабхьну.

 

 

Серенжемдиъ РД-йин милли политикайин ва диндин ляхнариз лигру министр Энрик Муслимов, РД-йин Халкьдин Собраниейин депутатар Алавудин Мирзабалаев ва Нариман Асваров, ДГУ-йин ректор Рабадан Муртузялиев ва хайлин жара касар иштирак гъахьнийи.

Серенжем ачмиш апIури, Энрик Муслимовди къайд гъапIганси, дагъустандин му авторарин китабар, илимдинна лингвистикайинси, культурайин терефнаанра заан маракьлувал айидар ву. Му китабар, бабан чIалар артмиш апIбан ва дурар халкьдин арайиъ яркьуди рягъбан метлеб ади, гьацира миллетарин арайиъ культурайин аьлакьйир уьрхбан бадали, адагънайидар ву.

«Дагъустандиъ 30-тIан артухъ урхуб-бикIуб айи ва адру, чпин улхбан нугъат айи ва са-сабди вуйи гъулариъ айи чIалар а. ЧIал – гьарсаб миллетдин культарайин пай ву. Гьаддиз чIалну инсандин уьмриъ уйнамиш апIурайи роль – асас роль ву»,

– гъапну министри.

Чан удучIвну улхуб давам апIури, министри мялум гъапIганси, Центр ачмиш гъапIхъан мина ккудушу 4 йисандин арайиъ Министерствойин кюмекниинди 16 китаб чапдиан адагъна.

4 йисандин арайиъ бабан чIалар артмиш апIуз 16 китаб адагъувал, йиз фикриан, думу Центрин директор Марина Гьясановайин кIубанвалин гьунарар улупувал ву.

Серенжемдиъ иштирак гъахьи ДГУ-йин ректори къайд гъапIганси, бабан чIалнахъди аьлакьалуди университетдиъ гъягъру серенжемариъ РД-йин бабан чIалар ахтармиш апIру Центри гьаммишан аьхю аьшкьниинди иштирак’вал апIуру.

«Гъи бабан чIалар аьгъю ва артмиш апIбаз аьхю фикир тувра. Амма йислан-йисаз му факультетдик урхуз кучIвуз гъюрайи студентарин кьадар цIиб шула. Аьхиримжи вахтна дагъустан чIалар агъю апIру факультетдиъ урхуз гъюрайи, чпин районариан вуйи студентариз кюмек вуди, СтIал-Сулейман ва Дахадаевский районарин главйири ужуди урхурайи студентариз стипендия тувра, ва гьацира думу факультетдиъ урхурайидариз туврайи академический стипендияра кьюб ражари артухъди ву»,

– гъапну ДГУ-йин ректори.

Китабарин презентацияйиз дуфнайи Алавудин Мирзабалаевди чан улхбаъ къайд гъапIганси, гъийин жигьилариз бабан чIал агъю апIуз ккунди имдар.

«Гьяйифки, гъийин глобализацияйин девриъ хайлин касар чпин ччиварихьан ярхла шула. Бабан чIалар аьгъю, ахтармиш апIурадар. Бабан чIаларихъди аьлакьалу гьамциб читин вахтна чIал уьбхюз ва думу артмиш апIуз чалишмиш шулайидарра а. Гьадму гьисабнаъ Марина Гьясанова кIулиъ ади бабан чIалар ахтармиш апIурайи Центрра а»,

– гъапну депутатди.

Центрин директор Марина Гьясановайи чан улхбаъ мялум гъапIганси, чапдиан адагънайи гьарсаб китабдин тираж 200 экземпляр ву. Дурар вари дагъустандин библиотекйириз ва мектебариз пай апIиди.

Хъасин чапдиан удучIвнайи китабарин гьарсар автори серенжемдиз уч духьнайидар чпи гъизигу зегьметнахъди таниш гъапIнийи.