Гьамусяаьт галарин арандиъ, хутIлар хъаъри, чвлин мягьсулар урзури, гъизгъин ляхнар кIули гъягъюра. Изан дапIнайи аьхю кьадар хутIлиин тум алабхьури либхурайи техника гъябкъиган, Гъалагъан участокдин «Яракский» ООО-йин кIулиъ айи Ревшан Мисрихановдикан, дугъан мяишат фици арайиз гъафиб вуш, ктибтуб ккун гъапIнийза.

 

 

«Узу мяишатдиз илтIибкI-найи му жил сифте Яракк гъулан «Юзбековский» совхоздиз дахил шулайи, ятагъ хъайи чIур вуйи. 2000-пи йисари совхозарихъ жил тартиб апIуз, мал-къара уьбхюз кьувват хъимдруваликан ухьуз аьгъяхьуз.

Мянфяаьт ктадабгъди дипнайи чIур гъябкъиган, гъулан жямяаьдихъди гаф-чIал дапIну, Мягьячгъалайиъ ва Хив райондиъ лазим вуйи кагъзар уч дапIну, 2005-пи йисан бицIи мяишат арайиз хуз кIури, кIулиз фикир гъафнийиз. Мяишат ачмиш гъапIу вахтна гизаф читинваларра алахьнийзуз, фицики ляхникан хабар адруган, гьубкIну техникайихъди тямин даруган, мал-къара уьбхюз тялукь ятагъ адру вахтна, гьелбетда, кIулиз, яраб, гьаму ляхин тамам апIуз узхьан удукьуйкIан кIури, жюрбежюр фикрарра гъюри шуйи. Ужуди-харжиди гьамус фукIа дар, Аллагьдин амриинди вари бегьем гъабхьну», – гъапи Ревшан Гьейбатуллаевичди.

Дугъриданра, думу гьякь ву, узуз му участок ухди аьгъю йишв вузуз. Душваъ айиб саб йирси, абхънайи ятагъ вуйи. Гьамус душваъ гизаф дигиш’валар духьна, йислан-йисаз ужуб мяишат арайиз гъюра, зегьмет зигуз юкIв хъайи инсанар ляхнихъдира тямин апIура.

Гъубшу йисан мягьсулар гъурзу 260 гайикан, ццийин йис къуруб хьпаз лигну, ужуб бегьер дархи, паласайиин али 140 гайин хутIил иган дарапIди гъибтнушра, Ревшан Гьейбатуллаевич, кIул ис дапIну, варибдикан миж кадабтIну гъузундар. Белки, ццийин йис бегьерлуб шул, туврурра, гъадабгърура сар Аллагь ву дупну, 40 гектарсан хутIларин артухъди изан дапIну, дугъу 300 гектариин чвлин мягьсулар алахьура.

Мяишатдиъ мал-къарайикан фу аш гьерхиган, дугъу гьамци гъапнийи: «160 аьхю малар айиз, гьамусяаьт дурар Агъул райондихъди сяргьятариин али заан сивариъ а. Накь телефондиан габнарихъди гафар гъапIунза. Гьавйир мичIал хьпаз лигну, гьаму вазлин аьхириз вари малар гализ ятгъиина кюч апIруси йикьрар гъапIунча. Чарвйир адарзуз. Дурарин ерина, йигъ-йишв лигури, чан гьякь кади инсан дидисну, холмогор жинснан 800 гъаз уьрхюраза. Гъазар, уьрдгер, пеэр узу байвахтнахъан мина ккунир вуза, гьарган ич дадайихъди шюхъяриз, уьрдгин чиркквариз лигури, дурариз хъайивал апIури шуйза, гьаддиз дадайин, пеэр-шюхъярин гьякьнаан, имбуну веледариинтIан уз’ин гизаф ихтибарвал алди шуйи. Уьрдгин чиркквар, бицIи гъазар, пеълин шюхъяр фукьан уткан, уччвудар мутмуйир вуш, фикир тувуна, – кIури, дум узухьинди аьлхъюри гъилигу. – Мяишатдиъ зегьмет зигурайи инсанариз гиран ктапIбан, дурари гъизигу зегьметнан гьякь тутрувбан тIулар адариз. Дурариз фици ккундуш, гьаци чпи гъизигу зегьметнан гьякь тувраза: пулиинди ва гьацира дяхин, мух, лебмейин, укIан тюкар тувбиинди, ккунириз чIивиди, ликриин илмиди мал туврза, ккундуш, мал дубккну, марцци йикк», – давам гъапIнийи дугъу. Ревшан Гьейбатуллаевичдин гафар гьякьлудар вуйиб мяишатдиъ лихурайи, узу чпихъди сюгьбат гъубху юкьур-хьур касди тасдикь гъапIний.

Магьа гъийин йигъаз Ревшан Гьейбатуллаевичдин мяишатдиъ гъагъ зигру ГАЗ-53 машин, игнар ургру комбайн, цIийи МТЗ Белорус ва дидиз лазим вуйи алатар, тележка, изан апIру кутанар, руг жвилли апIру боронар, тум убзру машин, дарман йивру авадлугъар, укI убшвру машин, алаф уч апIру кьюршар, тюкар апIру пресс масу гъадагъна. Мидланра гъайри, душваъ, 210 аьхю кIарч али малар дитIру ва дурарин панзар апIру ток-ран транспортерра ади, гьарсаб малин тIуннахъна убхъру шидра дизигну, хьадан вахтна малар ккаъру аьхю гъуршинра хъади ферма тикмиш дапIна. Гьацира агъзурихьна гъушар уршру гъазма, агъзур тонна мягьсул убшру склад, алафдин 12 агъзур тюк ккивру гъуршин, швушван сундухси ккабалгну, варибдихъди тямин дапIну, мансардара ккади кирпичдикан кьюб мертебайин гъаравлин хал тикмиш дапIна.

Мяишатдиъ аьрза кайи ляхин фу вуяв, кIури гьерхиган, Ревшан Гьейбатуллаевичди: «Гьамусяаьт фукIа, – гъапи. – Юкьуд йис улихьна Фюрюгъ гъулан сяргьятарихъди хъайи, марцци укIан алаф апIру хяр, гьар-кюл улубчIвну, ккапIнайи ва укI апIуз мумкинвал адайи. Аьхю зегьметниинди думу марцц дапIну ккудубкIунза. Гьамус, йисандин гьавйириз лигну, ужуб йисан 12 агъзур, ццисиб къуру йисан – 8 агъзур укIан тюкар шула. Сабсанубдикан пуз ккундузуз, Самур-Дербент гъанав тахил дубзнайи хутIлартIан исди ади хьувализ лигну, арх дапIну, мягьсулариз шид тувуз шулдайи. Му галарин ругар гъум кайидар ву, гьаддиз шид адруган, жилик кайи ламвал ухди дубгури, мягьсулари ужуб бегьер туври гъахьундар. Сач, саб миллиона 200 агъзур манат тувну, харижи гьюкуматдин кьюб жюрейиинди (ккундуш токдиинди, ккундуш соляркайиинди либхру) мотор али, 500 сантиметрин ацIушин айи турба хъайи насосдин станция масу гъадабгъунза. Гьамус думу къурушнаканра фикир апIувалин месэла имдариз», – аьлава гъапIнийи дугъу.

Гъит мицдар арбаб шулайи, дугъри, зегьмет зигуз ккуни касар кIулиъ айи мяишатар табасаран халкьдин арайиъ артухъ ишри. Хъа Ревшан Гьейбатуллаевичдиз чан мяишатдиъ хъана заан хъуркуьвалар гъадагъуз мюгькам сагъ’вал туври.