23-пи октябриъ Табасаран райондин культурайин хулаъ ярмарка кIули гъубшну. Думу ярмаркайиз Санкт-Петербургдиан ва Карелияйиан алверчйир дуфнайи. Му серенжем, коронавирусдин карантин айи вахтна алверчйириз алвер апIуз мумкинвал адруган, социалин программайиинди тешкил дапIнайиб вуйи. Ярмаркайиз гизафси духнайи шей’ар Финляндияйиъ гьясил гъапIдар вуйи.

 

Ярмаркайиъ жиларин ва хпарин тумаждин жюрбежюр палтар, гьацира жиларинна хпарин ва бицIидарин ликариин алахьру ботинкйир ва чекмйир айи. Алверчйири, чпин мутмийир лап ужуз кьиматназ, 70-80%-динкьан исди туврача кIури, инсанариз ктибтурайи. Амма табасаран халкьди гъадабгъурайи пулиз гъилигиган, мурарин мутмйирин кьиматар лап завун аьршариз удучIвнайидар вуйи. Мисалназ, гъадабгъухьа 55 000 манат кIуру куртка, думу 28 000 манатдиз масу туврача гъапнийи, 25 000 манат кIуру куртка – 8000 манатдиз. Ботинкйирикан улхуруш, 5 000 манат кIуру импортдин ботинкйир 2500 манатдиз туврайи. Хъа ерли магазнариъ му шей’ар хъана ужуз кьиматариз масу туврайи. Паркдиъ дуснайи яшлу касарин аьхю дестейира, ярмаркайиз дилигну удучIвурайидари, му кьиматар ихь халкьдиз хас вуйидар дар, гъапнийи.

Гизафси инсанар, выставкайиз лигуз гъюрайиганси, масу туврайи мутмйириз дилигну, кьяляхъ хътакурайи. Саб гафниинди, мурарин дав рякъ дубхьнайиганси рябкъюри айи. Ярмарка 23-пи октябриъ сад йигъантIан кIули гъубшундайи. Гюзчивалин тIалабар тамам апIбан бадали, культурайин хулазди учIвру йишвахь антисептикар ва маскйир дивнашра, ихь инсанарикан гизафдари дурариз фикир туври адайи.