«Марцци шид» программайиинди шид зигуз кIури улихьнаси ккирчнайи турбйир дутIуркIнайивализ лигну, 23-пи октябриъ Табасаран райондин Пилигъ гъулаъ цIийи турбйир ккирчбан бадали субботник кIули гъубшну. Муганайиз ккирчнайи турбйир, штун гуж аьхюб вуйивал себеб дубхьну, гьутIурччвнийи, гьаддиз цIийи турбйир штун давлениейиз дурум туврудар ву.

 

Субботникдиъ Хюрккарин советдиз дахил шулайи Хюрккарин, Хянгъярин, Пилгъарин мектебарин мялимар, гьацира Табасаран райондин администрацияйин бухгалтерар иштирак гъахьну.

Турбйириъди убхъру шид федералин «Марцци шид» программайиинди Къужникарин зиихъ хъайи сивариан мина Хючна гъулан центризди зигурайиб ву. Му программайин дахилнак гьаму манзилнаъ алахьурайи вари гъулар кахьра: Къужник, Улуз, Ругуж, Хянягъ, Пилигъ, Гурихъ ва жарадар.

Гьяйифки, му ляхнар кIули гъахувал кьюрдуз багахь шулайигантIан кIваин шулдар, пулра гьаму вахтназдитIан жара апIури адар. 2019-пи йисанра кьюрдуз багахь шулайи вахтна ккирчу турбйир, шид ипубси даргъну, гъутIуркIнийи, гьаддиз гизаф манигъ’валарра гъахьнийи. Штун гуж аьхюб вуйивализ лигну, думу ис апIбан бадали, гьарсаб гъулаъ резервуарар тикмиш апIура. Гъуларин жямяаьтарира, чпикан кюмек ккун гъапIиган, чпин хил’ан удукьруб апIура. Гьамкьан зегьметар дизигну гъапIу ляхнар зяя дархьиди, шид райондиз хъубкьур кIури, умуд кивдихьа.