2020-пи йисан 29-пи октябриз вуйи улупбариинди, Дагъустан Республикайиъ 15788 кас COVID-19 уьзриан аьзарлу гъахьну. Гьяйифки, гьадму кьадарнакан 770 кас кечмиш гъахьну. Думу уьзур кубчIвну дид’ан сагъ гъахьидарин кьадар 14119 кас ву. Му улупбар Урусатдин Роспотребнадзори тасдикь дапIна.

 

Гьюрматлу ватанагьлийир! Гъи Дагъустандин вари аьтрафариин коронавирусдин уьзур тарабгъна, республикайиъ яшамиш шулайи гьарсаб хизандиз дидин чIуру тясирлуваликан мялум дубхьна.

Ццийин хьадукран вахтна уьзур гьяракатниинди тарабгъуз хъюгънайиган, вари уьлкейиъ карантиндин мюгькам къайдйир кьабул гъапIнийи. Агьалйирин хизандин бюджетдиз лап читинди алабхърувал гьисабназ гъадабгъну, гьаму ражари думу жюрейин ижми къайдйир кьабул апIбанди дар.

Амма, октябрин 28-пи йигълан башламиш дапIну, уьлкейиъ машниин маскйир алди лицбан къайда мялум дапIна. Маска алдру касдин журум апIиди. Му къурхулу уьзрихъди женг гъабхбан бадали, ухьу варидари ухьхьан шлубкьан Роспотребнадзорин тIалабар тамам дапIну ккунду. Гизаф инсанар уч шлу йишварихь сар-сарихьан саб метрна гьацI манзил ади дийигъай, машниин маска алабхьай, учву дусну ляхин апIурайи йишваъ, жуван хулаъ марцци гьава убчIвбан бадали, кми-кмиди унчIвар арццай, раккнарин хили дисрушвар, телефонар спирт кайи штухъди марцц апIинай, хилар кми-кмиди сябнихьди жикIай, уьгью ясана инчи апIруган, ушвниин ва хъюхъниин хилин ягълухъ иливай, ягълухъ хьтарш, хил вушра иливну ккунду. Хилар дижикIну адру вахтна машнак, иллагьки хъюхъник, ушвник, уларик мукучанай. Бедендин температура за гъабхьиган, кефйир адарди гъахьиган, хъюхъяр дидиснаш, кIул иццураш, хулаъ гъузай, хулаз духтриз дих апIинай. Эгер му уьзриан аьзарлу духьнаш, хизандиъ айи инсанарихьан ярхлади гъузай. Фукьан читинди вушра, уьзур ихь арайиъ имбубсана яркьуди тарарабгъбан бадали, гьаму къайдйир уьрхювал чарасуз лазим ву. Жвуван ва ичв багахьлуйирин, гъарашугъарин сагъламвал уьбхбан гъаравлиъ гъузай.