Вари дюн’яйиз машгьур вуйи, сарихьанра ккагъуз дархьи спортсмен Гьябиб Нурмягьямедовди гьаму йигъари маракьлу талит кIули гъубхну ва чан спортдиин машгъул хьувалин рякъюъ му аьхиримжи кчIихуб вуйиваликан мялум гъапIну. Спортдин кчIихбарин вилаятдиъ Гьябибдиз ккагъуз даршлу Люкь кIуру ччвур тувна. Думу титул спортсменди, нубатнан 29-пи Абсолютный кчIихбарин чемпионатдиъ (UFC) 29-пи ражари гъалиб духьну, гъюбхну. Талитарин кьяляхъ Урусатдин Президент Владимир Путинди, гъалибвалихъди тебрик апIури, Гьябиб Нурмягьямедовдиз зенг гъапIну.
Чемпионат СатIи вуйи Аьрабарин Эмиратарин меркез Абу-Даби шагьрин КчIихбарин талитар гъахру жазирайиин (штун кьялаъ айи къурамат) гъубхнийи. Талитарин асас кчIихуб Гьябиб Нурмягьямедовдин ва Америкайин машгьур спорт-смен Джастин Гэтжийин арайиъ гъабхьну. Кьюбпи раунддиъ Нурмягьямедовди бугъмиш апIбан къайда ишлетмиш апIбиинди кчIихуб аьхирихъна гъабхну. Амма вари дюн’яйиъ, Гьябиб Нурмягьямедовдин нубатнан гъалибваликантIан жара мялуматнакан артухъси улхуб гъябгъюра – ккагъуз даршлу спортсмен варитIан ужудар чагълариъ айи вахтна, октагондиан гьаммишандиз удучIвну гъягъюра. Дугъу чан дадайиз туву гаф гардандиъ гъибисну.
КчIихуб ккебгъубси, Гья-биб Нурмягьямедовди улихьдин талитчйирихъдиси «тамашир» апIури гъахьундар, спортсмен кIваантIан натижа гъадабгъбиин лихурайи. Кьюбпи раунддиъ думу гъалиб гъахьну. Бугъмиш апIбан прием гъапIган, Джастин Гэтжи амрихъан гъушнийи.
Явашди ликариина за гъахьи Нурмягьямедов, учв гъалиб гъахьивалин гъавриъ гъахьибси, кьамкьариин деъну ва кIул жилиина ис гъапIну. Думу ишурайивалин вари гъавриъ гъахьнийи. Чан фикрихъна гъафи Джастин Гэтжийи, Гьябибдин багахь ис духьну, думу ккаарцуз хъюгъру. Иллагьки гьаму талитнаъ Гьябибдиз гъалибвал фукьан яманди лазим вуйиш, вари гъавриъ айи.
Му спортсмендин аьхиримжи йигъазкьан нумуна ва даягъ вуди гъахьи, гьаммишан багахь хьайи, кюмек туврайи багъри терефкар, чан адаш ва тренер хътарди гъабхурайи сабпи талит вуйи.
«Узу гьамина дуфнайи Дагъустандин дагълу гъулан аьдати бай вуза. Накь узуз йиз гъардши, дюн’яйиъ «Гуглдиъ» варитIан артухъди улхуб увкан гъябгъюра кIури, мялуматар туврайиваликан гъапнийи. Узхьан му ляхнихъ хъугъуз шуладарзухьан, гьаз гъапиш, учву фикир апIинай, йиз кIулиъкьан му фикрар адайиз. Узу, кIваъ чемпион хьуваликан фикрар уьрхюри, йиз адашдихъди сатIиди гъягъюрайза»,
– гъапну Гьябиб Нурмягьямедовди.
ПучIу гъагънан категорияйиъ кчIихбарин Абсолютный чемпиондин (UFC) титул уьбхюри, Гьябибдин шубубпи раж ву. Гъагънан категорияйиз дилигди, спортдин пишекарвалин рякъюъ саб ражарикьан магълуб дархьи спортсменси, UFC-йин дюн’яйиъ варитIан адлу спортсменарин рейтингдиъ Гьябиб Нурмягьямедов варитIан заан – сабпи йишв’ин ал. Гъалибвалин кьяляхъ ихь спортсмен зийнин иццрувалин сузайикк ккади талитариз удучIвуваликанра хабар гъабхьнийи.
«Шубуб гьяфта улихьна Гьябиб, лик ва кьюб тIуб дюргъну, больницайиъ дахъну гъахьну. Мидкан узуз дугъу гафра гъапундар, узуз му мялумат дугъан кюмекчйирикан гъеебхьунзуз. Думу дюн’яйиъ варитIан дирбаш инсанарикан сар ва варитIан ужур спорт-смен ву»,
– гъапну UFC-йин президент Дэйна Уайтди.
Гьябиб спортдин карьерайиъ варитIан заан йишв’ина удучIвну. 29 талитнаъ – 29 гъалибвал гъадагъувал – му ужуб натижа ву. Амма адашдихъди сатIиди ккебгънайи ляхин Гьябибдиз думу хътарди давам апIуз ккунди адар.
«Му кчIихуб йиз аьхиримжинуб вуйиз. Адаш хътарди узу сану кчIихуз удучIвударза. Узу шубуд йигъандин арайиъ дадайихъди гафар апIури гъахьунза. Дугъаз узу адаш хътарди кчIихбаан талитариз удучIвну ккундайи. Амма узу, му кчIихуб аьхиримжи хьибди кIури, гаф тувунза. Эгер узу гаф тувнуш, гьадму гафниин дийигънура ккунду. Эгер учвуз абйир-бабар имиш, шлубкьан артухъди дурарин гъвалахъ йихьай. Узуз имбур сар дада вузуз, ва йиз азад вахт артухъси дугъахъди гьапIуз ккундузуз»,
– гъапну спортсменди.
Гьябибдин адаш Аьбдул-манап Нурмягьямедов юкьяр дисбан кчIихбариан спортдин мастер вуйи. Дугъу кчIихбан самбойиан вари дюн’яйин 18 чемпион тербияламиш гъапIну. КчIихбан ва алархьбан спортдин къайдйирихъди сабпи спортсменариз мюгькам тербияра туври гъахьну.
«Узу гьаммишан кIураза: бачкIикк фикирлу кIул ккади хьувал – варитIан важиблуб гьаму ву»,
– кIури гъахьну Аьбдулманап Нурмягьямедовди.
Рингдиъра, аьдати уьмриъра жвув жилирси гъахузра Гьябибдиз адашди улупнийи. Ктикьу кчIихбариъ сар-сарихъди талитназ удучIвайиз, спортсменари чиб-чпиз курччвру гафар апIури шулу. Му спортдиъ тамашачйирик маракьлу гьевес капIрайи шоуйин элементдин саб аьдатси гьисаб апIура. Нурмягьямедов чаз кIурайи гафарихъ юкIв ижми дапIну хъпехъури гъахьну, саб ражарикьан жаваб тувундар, хъа вари хъял талитнаъ кчIихбариъ улупури гъахьну. Анжагъ саб ражари ирландияйин вуйи спортсмен Конор Макгрегориин гъалиб гъахьиган, залиан Гьябибдиз чан адаш ужуз апIру гафар кIури гъеерхьиган, думу люкьси октагондиан утIурччвну, чак хъял капIуриин алархьнийи.
Нурмягьямедовди чан аьхю-нуб пай кчIихбар бугъмиш апIбан спортдин къайда ишлетмиш апIбиинди ккудукIну. КчIихбарин къайдйирикан бегьемди аьгъювалар айи Владимир Путинди Гьябибдин спортдин техникайиз заан кьимат тувну: «Гъалибвал мюгькамди ва гьякьлуди гъадабгъунва. Узу кчIихбариз гъилигунза, маншаллагь. Бугъмиш апIбан ужуб прием ишлетмиш гъапIунва. Дюзди, кьатI’иди месэла гьял апIру прием вуйи. Уву дугъан дюд чIюбкьюри гъахьундарва. Ав, узу гьякьлуди кIураза, узуз рябкъюрайзуз, кчIихбан къайда уьбхюри, уву кьюбиб терефарианра думу гъючIюркьнийва. Вари дюзди ва дугъриди вуйи».
Дугъриди ва ухди – гьаму терефар уьрхюри кчIихуз улупури гъахьну дугъаз чан тренер – адашдира.
«Адашди узу гьаммишан тянкьид апIуйи. Талитар ккудукIубси, узу сабпи нубатнаъди дугъаз зенг апIуйза. Дугъан гафар тебрик апIбалан ваъ, тянкьид апIбалан, узу гьапIраш, фу дапIну ккундийиш, фицдар гъалатIар деетнуш, гьаддикан шуйи. Узу хъпехъуйза ва фикир апIуйза, гьан чIяаьн ву, узу гъалиб гъахьунзаки, тебрикра апIин, адаш, кIуйза. Аьхириъ адашди, гъач хулаз, хъасин гафар апIурхьа, кIуйи…»,
– ктибтура Гьябиб Нурмягьямедовди.
Аьбдулманап Нурмягья-медов хьадну COVID-19 вирусдиан аьзарлу гъахьну. Москвайиъ духтрари думу сагъ апIуз чпихьан шлу вари чарйир гъизигну. Амма уьзри думу деетундар. Гьябиб гьар йигъан адашдихьна больницайиз гъягъюри гъахьнийи. Гьябибди адаш сагъ апIуз чара дибрихъувал чан терефназ хабарра адарди гъафи, варитIан учIру гъурд кубкIувалси гьисс гъапIну. Амма дугъу чан хасиятнан ижмивал, сабурлувал улупну. Октагондиъ учIвну ва чан уьмриъ варитIан гъагъи талитнаъ гъалибвал гъадабгъну.
Гьябиб Нурмягьямедов вари дюн’яйиъ тебрик апIура. Дурарин арайиъ Дагъустандин, Чечендин ва Урусатдин саки вари регионарин главйир, дюн’яйин машгьур спортсменар, политикар харижи уьлкйирин президентар ва жарадар а.
«Жвув’ин гьамкьан улар алиган, гизаф кьадар инсанар жвувахьинди лигурайиган, жвув машгьур гъахьиган, чешне вая нумуна хьуб лап гъагъиди ву. Гьаддиз уьмриъ гъалатIариз йишв гъибтну ккундар»,
– гъапну Гьябиб Нурмягьямедовди.
Заан кIакIариз удучIувал Гьябибди чан адашдин гюзчиваликкди Дагъустандин дагълариъ ккебгънийи. Спортдин Олимпдин кIулизра думу сарди за гъахьундар. Нурмягьямедовар душв’ин кьюр ал – адаш ва бай.
