Гьар йисан 10-пи ноябриъ МВД-йин гъуллугъчйири чпин пишекарвалин машквар къайд апIури шулу. Тахсиркарваларихъди женг гъабхбаъ, къанун ва къайда мюгькам апIбаъ, уьлкейин хатIасузвал ва саламатвал тямин апIбаъ МВД-йин гъуллугъчйирин ляхни важиблу йишв бисура. Му гъуллугънаъ Ватандиз вафалувалиинди лихурайи ихь ватанагьлийирра цIиб дар.
Улихьнаси Дербент шагьрин ОВД-йин ПДН-дин начальник, полицияйин майор Ражаб Ягь’яевдихъди (шиклиъ) гюрюшмиш гъахьунза. Фици гъапишра, аьдати инсанарин хатIасузвал, саламатвал, жямяаьтлугъдин къанун-къайда уьрхбан ляхин кьатI’и вуди полицияйин гъуллугъчйириина ихтибар дапIна. Наан ва филан вушра, фициб жигьатнаъ гъабхьишра, къурхулувал арайиз гъафиган, ухьу гьарсар полицияйиз илтIикIурхьа, ва му ихь уьмриъ думу аьдати ляхинси убчIвна. Хъа инсандин фикриъ умудсуз ляхин мюгькамди убчIвурдар. Гьаци вуйиган полицияйик ихь гьарган умуд кайихь.
Му гъуллугънаъ ляхин апIури, Ражаб Ягь’яевдин хайлин йисар ву, хъа 2015-пи йисхъан мина дугъу ОВД-йин яшнакк ккуркьну адрударихъди ляхин гъабхру отделдин начальникдин вазифйир тамам апIура.
Ражаб Ягь’яевдин гафариинди, Дербент райондин ОВД-йин ПДН-ди гъулариъ текрар ва дестейиинди шулайи бицIидарин тахсиркарвалар цIиб апIбан зиин хъуркьувалиинди зегьмет зигура, пропагандайинна профилактикайин ляхин яваш апIурдар.
– Яшнакк ккуркьну адрударин арайиъ тахсиркарваларин профилактика апIувал, баяр-шубариз дюз рякъ улупувал – йиз асас вазифа вуйиз. Узуз ихь бицIидар Ватан ккунидар, халис ватанперверар духьну ккундузуз, – кIура Ражаб Ягь’яевди.
Мектебариъ, вузариъ гъахурайи гюрюшариъ дугъу дидин экстремизмди туврайи зарарнакан, республикайиъ ва Дербент шагьриъ шулайи къанунсуз дюшюшарикан яркьуди сюгьбатар гъахура. Баяр-шубарихъди тешкил апIурайи гюрюшариъ иштирак хьуз мялимариз, классдин руководителариз, социологариз, абйир-бабариз дих апIура, тахсиркар бицIидарин абйир-бабарихъди кIул’инди сюгьбатар гъахура.
«Бязи бицIидари, абйир-бабари гъиву тюгьмет кьабул дарапIди, хъял дапIну, хул’ан гьергбан ва гъилицнацвал апIбан дюшюшарра алахьуру. Мицдар живанарихъди профилактикайин серенжемар гъахурача, дурар гьисабназ гъадагъурача ва гюзчиваликк гъитрача.
Девир дигиш дубхьна, белки, живанарин хасиятар дигиш хьувалра гьаддикан асиллу вушул. Хъа абйир-бабари, мялимари, классдин руководителари ва социологари гьам мектебдиъ, гьамсана хулаъ тербияйин ляхин буш дапIну ккундар.
Магьа гъубшу 2019-пи йисан 14 йислан 18 йис’инакьан яшнаъ айи 11 касди тахсиркарвалар гъапIну, хъа 2020-пи йисан дицдар касар кьюртIан дар. Дурари гъапIу тахсиркарвалра фу ву гъапиш, икI апIувал. Ккудушу йисаритIан гьамус бицIидарин тахсиркарвалар яваш духьна. Учу учхьан шлу къайдайиинди ляхин апIурача. Дурарихъди профилактикайин ляхин гъабгъувал яркьу апIуб гьар йигъаз планламиш апIурача. Учу дицдар бицIидарин абйир-бабарихъди, хулаз гъягъюри, дурариз ич идарайиз дих апIури, ляхин гъабхурача, хъа тахсиркар гьаммишан гюзчиваликк гъитрача.
Багарихьди полицияйиъ ляхин апIурайи гъуллугъчйирин машквар шула. Коллектив фукьан вушра ужуб вуйич, дид’ин фукьан вушра разиди вуза ва марцци кIваантIан полицияйин вари гъуллугъчйир му машкврихъди тебрик апIураза. Ич ляхин фукьан вушра читинуб вуйич, Аллагьдиина аманат дапIнайи касар вуча. Харжиб пидархьа ва харжиб апIидархьа. Учу кIваин дапIну, мина гъюбаз увузра чухсагъул», – аьлава гъапIнийи дугъу.
Макьалайин аьхириъ Дербент райондиъ ва вари Урусатдиъ полицияйиъ ляхин апIурайи гъуллугъчйир чпин пишекарвалин йигъахъди кIваантIан мубарак апIуз ккундузуз. Гъит дурариз ляхниъ хъуркьувалар ишри, Аллагьди сагъ’вал туври.
