30-пи октябриан 2-пи ноябриз Табасаран райондиъ Хючна гъулан гъвалахъ хъайи Рибчрарин хялар кьабул апIру комп-лексдиъ «Табасаран-2020» кIуру жигьиларин форум кIули гъубшну. Дина Дагъустан Республикайиъ айи вари вузариан 100-тIан артухъ студентар уч гъахьнийи.
Форумдиз уч духьнайидар Роспотребнадзорин тIалабариинди кьабул апIу-райи. Волонтерари хяларин температура ебцури, гьарурихьна маскйир туврайи, гьацира антисептикарихъди хилар тартиб апIуз гъитрайи.
«Табасаран-2020» 30-пи октябриъ хябяхъган Табасаран райондин культурайин хулан артистари концерт улупбиинди ачмиш гъапIнийи. Ихь халкьдин машгьур артистар Бесханум Гюльмягьямедовайи, Гюльназ Гьяжикъурбановайи, Оксана Ибрагьимовайи, вари уч духьнайидар гъавриъ шлуганси, мяълийир урус чIалниинди гъапIнийи. Дурарин гьарсаб мяъли тамашичйири гурлу гарччлариинди кьабул апIурайи.
Мярака ачмиш апIури, Табасаран райондин глава Мягьямед Къурбановди къайд гъапIганси, му жюрейин серенжемар гъахбакан жигьилариз аьхю мяна а. «Учву Табасаран райондин жилариин кьабул апIуз гизаф рази вуча. Му форум, туризмдиз яркьу рякъяр ачмиш апIбан бадали, гьар йисан Табасаран райондиъ гъабхидихьа. Республикайин ва райондин гъюзимбу уьмур учвкан асиллу ву. Ичв цIийи фикрари ва хиялари халкьдиз хайир кайи ляхнар арайиз хур кIури, умуд кивдихьа, хъа учу учвуз вари терефарихъан кюмек апIуз ва ичв мяналу фикрар, хиялар кIулиз адагъуз гьязур вуча», – гъапнийи райондин кIулиъ айири.
Форумдин хялижв вуйи, вари Урусатдин халкьдин кьялан ва бицIи дилаварчйирин «Урустдин далу» тешкилатдин президент Александр Калининдира (думу Табасаран райондиз чан деле-гация хъади дуфнайи), Мягьямед Къурбановдин гафариз кюмек туври, уьлкейин гъюзимбу уьмур тешкил апIбак жигьилари аьхю пай киврайиваликан гъапнийи.
«Мицдар серенжемар артухъси духьну ккунду, фицики дурариъ учвхьан ичв хиялар, фикрар ачухъ дапIну арайиз адагъуз шулчвухьан», – къайд гъапIнийи Александр Калининди.
Сабпи йигъан тешкилатчйири дих дапIнайи пишекрари студентариз туризмдикан, думу артмиш апIбан рякъярикан ктибтнийи.
Дидланра савайи, форумдин иштиракчйириз Та-басаран райондин тарихи йишвариз – Дюрхъаз, Ургур чвуччвун ва чуччун гъалайиина, «Дагъ-бары» цал’ина экскурсйирра тешкил гъапIнийи.
Кьюдпи йигъан форумдиъ студентариз жюрбежюр цирк-лариан цIийи аьгъювалар тувбан серенжемар, мастер-классар, тренингар тешкил гъапIнийи. Дурар Дербент шагьриан вуйи архитекторар Шамиль Рягьметовди ва Артём Никитинди, «Жигьиларин центрин» РД-йин ГКУ-йин директорин заместитель Марат Рягьимовди, айтIан туризм артмиш апIбан эксперт Марат Ибрагьимовди, жямяаьтлугъ проектированиейин эксперт Мирза Абасовди ва жарадари кIули гъухнийи.
Форумдин натижйир йивури, дидин директор Рамис Рамазановди вари уч духьнайи касариз, му серенжем кIули гъабхуз кюмек гъапIдариз варидариз аьхю чухсагъул мялум гъапIнийи.
Форумдин натижйир йивбан серенжемдиъ Мягьямед Къурабанов ва Дагъустан республикайин жигьиларин ляхнариз лигру министрин заместитель ПатIимат Уьмарова иштирак гъахьнийи.
РД-йин жьигьиларин ляхнариз лигру Министерствойин вакили республикайиъ жигьиларин политика уьмриз кечирмиш апIбакан ктибтнийи. Дугъан фикриинди, мицдар жигьилариз вуйи мяналу форумар гьарсаб райондиъ кIули гъухнийиш, гизаф ужу шуйи.
Серенжем кIули гъябгъюрайи вахтна Мягьямед Къурбановди ва ПатIимат Уьмаровайи студентарин саб хайлин суалариз жавабарра тувнийи.
«Табасаран-2020» форум дуствалин дережайиъди ва мянфяаьтлуди кIули гъубшну. Жигьилари саб хайлин аьгъювалар гъадагъну, гьацира чпиз дустар гъагну», – ктибтнийи дугъу ич сюгьбатнаъ Рамис Рамазановди.
Форум концертдиинди ккудубкIну.
Дупну ккундуки, жигьиларин «Табасаран-2020» форум вари Урусатдин жигьиларин проектарин конкурсдиъ гъалиб гъабхьи тялукь грантдин дакьатарихъ ва Федералин жигьиларин ляхнарин агентствойин, Табасаран райондин администрацияйин, Дагъустан Республикайин жигьиларин Министерствойин ва ДГУ-йин профсоюздин кюмекниинди кIули гъубхнийи.
Дидин асас метлеб – жигьиларихъди ляхин апIбан цIийи рякъяр ва саягъар яратмиш апIувал ва агьлйирин арайиъ туризм яркьуди рабгъувал вуйи.
