Дагъустандиъ гриппдиз ва ОРВИ-йиз аькси вуйи вакцинация гъабхбан профилактикайин серенжемар давам шула. Гъийин йигъаз республикайиъ, хьадукра ва чвну бедендиз мичIал хьпан натижайиъ ачмиш шлу уьзрарихьан уьрхбан бадали, 733 785 касдиз прививкйир дапIна, дурарикан 400-тIан артухъ бицIидар ву.

 

 

 

Гьамусяаьт Дагъустандиъ гриппдихъди ва ОРВИ-йихъди аьлакьалу тIягъвнин аьгьвалат къайдайиъ а. Аьхиримжи ургуд йигъан, яркьуди тарагъру вирусарин инфекция кубчIвну, духтрари 2240 кас гьисабназ гъадагъну. Му улупбар тIягъюн мялум апIбан бадали лазим вуйи улупбартIан лап исдар ву.

РД-йин сагъламвал уьбхру министр Жамалудин Гьяжиибрагьимов тазади ОРВИ-йиз ва гриппдиз аькси вакцинайин руб гъивдарикан сарпир вуйи. Дугъу, прививкайин чарасузваликан улхури, республикайин агьалйириз вакцинация гъабхбан теклиф гъапIну.

Министрин гафариинди, уьзрихьан уьрхру варитIан ужуб къайда – профилактика апIувал ву.

«Гъийин йигъан Дагъустандин медицинайин идарйир гриппдиз аькси прививкйирихъди тямин дапIна. Иллагьки коронавирусдин вари дюн’яйиъ тарабгънайи тIягъвнин шартIариъ бедендин иммунитет мюгькамди айивали кьюб инфекцияйихьан ярхлади гъузуз мумкинвал тувди. Чвлин вахтна гриппдиз ва вирусдин учIру инфекцйириз аькси профилактика апIбаз вакцинация гъабхували, агьалйири чпин беден мюгькам апIували ва дюз къайдайиинди хураг ишлетмиш апIували кюмек тувди»,

– къайд гъапIну Жамалудин Гьяжиибрагьимовди.

КIваин апIуз ккундучузки, гъябгъюрайи йисан прививкайин рубар йивбан кампания ккудушу йисари гъабхру вахтнатIан цIиб улихьна ккебгъну. Республикайиъ 60% агьалйириз прививкайин рубар йивувал планламиш дапIна. Дицдар касарин кьадар 1,5 миллионтIан артухъ шула.