Улихьнаси узу Дагъустандин Огни шагьрин ЦГБ-йиз гъушнийза. Дина гъягъбан асас себеб – больницайиъ коронавирусдин уьзрихъди фици женг гъабхураш лигувал ва аьзарлуйириз медицинайин тяди кюмек тувру отделениейин гъуллугъчйирихъди сюгьбат апIувал гъабхьнийиз.
Медицинайин тяди кюмек тувру отделениейиъ учIвиган, ляхникан сюгьбат ккебгъайиз, хайилин вахтна ккилигури дийигъуз мажбур гъахьнийза, гьаз гъапиш, мушваз, медицинайин кюмек ккунди, хъади-хъади аьзарлуйир илтIикIурайи. Думу йигъан ляхин апIурайир жигьил духтир Эмирбег Аьдилов вуйи. Ич сюгьбатнаъ дугъу чпин отделениейин ляхникан ктибтнийи: «Узу мушваъ ляхин апIури 4 йис вуйиз. Ич отделениейин заведующий Эльмира Адамова ву, отделениейиъ 24 пишекри ляхин апIура, гьадму гьисабнаан 3 духтир ву. Коллектив ужудар пишекрарикан тешкил дапIнайиб ву, ва ич вазифйирихьнара дикъатлуди янашмиш шулача. Гьаци дарш, ляхин апIуз читин алабхъуру, гьаз гъапиш аьзарлуйин сагъламвал духтри сабпи нубатнаъ туву кюмекнакан асиллу ву. Ццийин йис ич коллективдиз гизаф читинуб гъабхьну. Гьар йигъан 20-25 азарлуйихьна дих апIру ва дурарихьна чарасуз вуди душну ккунду.
– Коронавирусдихъди фици женг гъабхурачва ва вари йишвариз гъягъюз хъуркьри айчва?
– Аьхюбсиб пай дих апIрудар гъулариан ву. Дагъ. Огни шагьрин багахь ва цIиб ярхла ерлешмиш духьнайи гъуларизра гъягъру вахтар гизаф шулайич. Мисалназ, КIежух, Чинар, Мамедгъала поселокариз, Жемикентдин постнахънакьан ерлешмиш духьнайи гъулариз гъягъюри шулча.
Гъулариъ айи аьзарлуйир чпин гъулан духтрихьна (фельдшерихьна) илтIикIну ккунду, хъасин ФАП-дин пишекри медицинайин тяди кюмек тувру гъуллугъназ дих апIбан къарар адабгъуру. Учуз алабхъурайи асас читинвал гьадму вуки, аьдат вуйиганси, ухьухь духтриз анжагъ уьзур лап гъагъи гьялназ гъафигантIан дих апIурадар. Ихь агьалйирикан чпин уьзур гъагъиди артмиш хьуз гъидритувал хаиш вуйич. Коронавирус уьзриан йихурайидарин гизаф пай духтрарихьна илтIикIуз кьан гъапIу касар ву. Эгер аьзарлуйир вахт-ниинди духтрарихьна илтIикIуйиш, йихувал цIиб духьну, инсанар сагъ апIбан натижйир ужудар хьидийи.
Му тIягъвнихъди женг гъабхбан бадали, гьамус дармнарин тяминвалра ужу гъабхьну. Отделение цIийи машинарихъдира тямин дапIна. Мидланра савайи, больницайиъ ужудар ерли пишекрари ляхин апIура.
Жямяаьтдигъна удучIвруган, больницйириз, базрариз, аьхю туканариз ва хайлин инсанар уч шулу йишварихьна гъягъруган, варидарикан маскйир алахьуб тIалаб апIурача. Амма сумчрариз гъягъюрайидари ич тIалабназ фикир туврадар. Сумчир, гьелбетда, гьарсаб хизандин шадлу гьядиса ву. Сумчриъ, цIийи хизанси, дурарин багахьлуйир, майил-мадат, гъул-жямяаьт уч шулу. Хъа сумчриъ маскйир алахьну деуз шлуб дар. Магьа гьамци инсанари чпиз уьзур гъазанмиш дапIну гъюру. Гьаму месэла ихь республикайин улихь-кIулихь хьайидари дюз гъюру къайдайиинди гьял гъапIнийиш, гизаф ужу хьибдийи. Жвуву чав дюрюрхиш, жарарихьан фукIара апIуз шулдар.
Узу гьеле жигьил пишекар вуза, хъа аьхириъ пуз ккундузузки, гьелбетда, сабпи нубатнаъ туву медицинайин кюмекнакан инсан сагъ хьпан натижара ассилу ву. Медицинайин тяди кюмек тувру ич отделениейин коллективдиз чпин ляхниъ хъуркьувалар ккун апIураза.
