Ноябрин 9-пи йигъан Дагълариъ айи Къарабахдиъ дявдин цIа дебккбан гьякьнаан вуйи йикьрариин Азербайжандин Президент Илгьам Аьлиевди, Урусатдин Президент Владимир Путинди ва Арменияйин Премьер-министр Никол Пашинянди къулар гъизигну. Думу йикьрар гизаф йисари азербайжнаринна эрменйирин арайиъ айи гъалмагъал гьял апIбан аьхиримжи пай гъабхьну. Дидин гьякьнаан ноябрин 9-пи йигъан Урусатдин Президент Владимир Путинди мялумат тувну.

 

Дугъу къайд гъапIганси, йикьрар 10-пи ноябриъ мос-квайин вахтниинди йишвандин сяаьт сабдиз саб дакьикьа гъилибххъан тина кьувватнаъ убчIвну. Армения ва Азербайжан чпи дидиснайи йишвариин дийигъну гъузну ккунду. Мидланра гъайри, кьюбиб терефарира йисирвализ гъадагънайи эскрарин ва гъийихдарин майтар кьяляхъ тувну ккунду. Дагълариъ айи Къарабахдиъ хъяркьнайи вари рякъяр арццди. Арменияйи 2020-пи йисан ноябрин 15-пи йигъ улубкьайиз Азербайжан Республикайиз Кельбажарский район, хъа декабрин 1-пи йигъ улубкьайиз – Лачинский район кьяляхъ тувну ккунду. Дидланра савайи, эрмен-йири Азербайжандиз 20-пи ноябрь улубкьайиз Къарабахдин Агдамский районра тувну ккунду. Арменияйихь Дагълариъ айи Къарабахдихъди уьлкейин аьлакьа тямин апIру, 5 километр яркьушин айи Лачинский коридор гъубзди.

Гьамусяаьт Къарабахдиъ Урусатдин Федерацияйин Яра-кьлу Кьувватарин ислягьвал тямин апIру эскрарин контингент ерлешмиш апIура. Дидин кIулиъ Урусатдин Президент Владимир Путиндин Указ-диинди ихь ватанагьли, Урусатдин Игит, генерал-лейтенант Рустам Мурадов тяйин гъапIну. Урусатдин эскрари дявдин цIа дебккбиин ва эрменйрин яракьлу кьувватар душв’ан адаъбан зиин гюзчивал гъабхиди.

Гьаму йикьрари Дагълариъ айи Къарабахдиъ ислягьвал хьуз гъитди дупну, умуд кивдихьа.