Вахтназ вуди Дагъустан Республикайин Главайин вазифйир тамам апIурайи Сергей Меликовди улихьна йигъари республикайин Правительствойин саб жюре жавабдар гъуллугъариина цIийи гъуллугъчйир тяйин гъапIну.

 

Гьамци, 10-пи ноябриъ адабгъу Указдиз асас вуди, Дагъустандин Главайин ва Правительствойин Администрацияйин кIулиъ Алексей Гьясанов тяйин гъапIну. Жара Указдиинди улихьди думу гъуллугънаъ лихури гъахьи Владимир Иванов гъуллугънахьан азад гъапIну.

РД-йин Главайин ва Правительствойин Админист-рацияйин Управлениейин айтIан политикайин ва ерли самоуправлениейин месэлйириз лигру начальникдин гъуллугъниина Къурбан Нажмудинов тяйин гъапIну.

Сергей Меликовди чан цIийи Указдиинди республикайин Правительствойин Председателин сарпи заместителин гъуллугъниинна Аьбдулпятягь Амирханов тяйин гъапIну. Жара Указдиинди думу гъуллугънаан Гьяжимягьяммед Гьюсейнов азад гъапIну.

Дагъустан Республикайин Госсекретарин гъуллугъниина улихьди Дербент шагьрин мэрин гъуллугънаъ лихури гъахьи Хизри Абакаров тяйин гъапIну. Гъийин йигъаз му инсанариз варитIан маракьлу вуйи хабар дубхьна. Госсекретарин гъуллугъ гизаф йисари ичIиди гъубзнайи. Республикайин къанундиз асас вуди, Госсекретарь – Конституцияйи тувнайи бязи ихтиярар уьмриз кечирмиш апIбаъ республикайин Главайиз кюмек апIрур ву. Госсекретарин вазифа – республикайиъ айи аьгьвалат гюзчиваликк гъибтувал, Главайин указар тамам апIбиин гюзчивал гъабхувал ву. Дербентдиъси, вари Дагъустандиъра машгьур духьнайи Хизри Абакаров му гъуллугънаъ дерккуваликан республикайин агьалйир гизаф шад гъахьну.

Багарихьди республикайин Правительствойин жюрбежюр гъуллугъариъ хъана цIийи инсанар дерккбанди ву.