Урусатдиъ гьар йисан ноябрин 10-пи йигъан РФ-дин айтIан ляхнарин гъуллугъчийин Йигъ къайд апIури шулу. Думу йигъан ихь уьлкейиъ къанундин къайда, агьалйирин яшайиш уьбхюрайи, гьаммишан тахсиркарваларихъди женгнаъ айи, чпин гъюнариин аьхю жавабдарвал али полицияйин гъуллугъчйир кIваин апIури шулхьа.
Машкврин эвел 1917-пи йисан 10-пи ноябриъ РСФСР-ин НКВД-йи «Рабочий милицияйин гьякьнаан» къарар кьабул апIбахъди аьлакьалу ву. Хъа думу йигъ 1962-пи йисан къайд апIуз хъюгъну, 1980-пи йисан СССР-ин Верховный Советдин Президиумдин Указдиин къул зигбан кьяляхъ сабпи ражари машкварси къайд гъапIну. СССР дабгъбан кьяляхъ Урусатдин Федерацияйира машквар къайд апIбан аьдат давам апIура.
2020-пи йисан Дагъустандиъ айтIан ляхнарин органар ачмиш гъапIхъан мина 20 йис тамам гъабхьну. Дагъустандин милиция арайиз гъафи йигъси 1920-пи йисандин 28-пи апрель гьисаб апIуру. Думу йигъан Темир-Хан-Шурайиъ Желаледдин Коркмасовдин регьберваликкди кIули гъубшу Дагъустандин областдин дявдинна инкьилабдин комитетдин заседаниейиъ «Инкьи-лабдин ва жямяаьтлугъ къайда уьбхбан бадали, Уьру милиция арайиз хувалин гьякьнаан» къарар кьабул гъапIнийи. АйтIан ляхнарин сарпи нарком вуди Керим Мамедбегов тяйин гъапIнийи.
Гьадму йигъхъан мина Дагъустандин полицияйин гъуллугъчйир республикайин агьалйир тахсиркарваларихьан, вари жюрейин гъачгъарихьан уьрхбан женгнан улхьан жергйириъ а. Магьа саки саб аьсрин вахтна къанундин къайдайин гъаравлиъ айи гъуллугъчйири республикайин улихь лайикьлуди чпин буржи тамам апIура ва гележегдиъра чпиз табшурмиш дапIнайи ляхин тамам апIуз гьязур ву.
Дагъустандин МВД-йин гъуллугъчйири Ватандин Аьхю дявдин йисари къанундин къайда уьбхбак, гъалибвал багахь апIбак аьхю пай кивну. Дурарин арайиъ Ватандаш дявдин Игит, Буйнакск шагьрин милицияйин начальникди гъилиху Къара Къараев, Каспийск шагьрин ГОВД-йин начальникди гъилиху Советарин Союздин Игит Федор Селиванов, МВД-йин парткомдин секретарди гъилиху Советарин Союздин Игит Гьясрат Аьлиев, «Смершдин» дявдин контрразведчик, хъасин гизаф йисари министрин заместителди гъилиху Расул Халидов, отставкайиъ айи подполковник, дявдин сабпи сяаьт сяргьятариин кьабул гъапIу милиционер, шаир Виктор Бударев ва гьацдар жарадар а.
Милицияйин гъуллугъч-йири, фронтдиъси, вари жюрейин бандитарихъди, дявдиз гъягъбаккан кIул ккадабгъдарихъди, душмандин тереф уьбхюри, жиниди зарар туврударихъди женг гъабхури, далу терефнаъра чпин игитвал улупну.
Гъийин девирра рягьятуб дар. Полицияйин гъуллугъчйир гьамусра экстремизмдин ва терроризмдин гьяракатарихъди женг гъабхрударин улхьан жергйириъ а. Жвуван жан гьяйиф дарапIди, дурари дагъустанлуйирин ва Урусатдин Федерацияйин вари ватандашарин ихтиярар уьрхюра. 1999-пи йисан вари халкьарин бандитарин дестйир Дагъустандиъ архьиган, ихь милицияйин гъуллугъчйири ликрилан кIул’ина яракьлу духьнайи вягьшйирсдар душмнарихъди вуйи женг кьабул гъапIну. Гьамусдин деврин Дагъустандин полицияйи БотIлих, ЦIумада, Новолак районариъ, Кьадар зонайиъ машгьурвал гъазанмиш гъапIну. Вари халкьарин бандитарин гьяракатарихъди вуйи женгариъ Дагъустандин МВД-йин 5 агъзуртIан артухъ гъуллугъчйир иштирак гъахьну, думу кьадарнакан 4 касдиз Урусатдин Игитарин ччвурар (кьюр касдиз йикIбан кьяляхъ) тувну, 1168 кас гьюкуматдин наградйирихъди лишанлу гъапIну, 55 кас бандитарихъди вуйи женгариъ гъийихну.
Ноябрин 10-пи йигъан кIули гъубшу, РФ-дин айтIан ляхнарин гъуллугъчийин Йигъ къайд апIбаз бахш дапIнайи серенжемдиъ вахтназ вуди РД-йин главайин вазифйир тамам апIурайи Сергей Меликовра иштирак гъахьну.
Республикайин айтIан ляхнарин министр Аьбдурашид Мягьямедовди ОВД-йин гъуллугъчйир ва ветеранар машкврихъди тебрик гъапIнийи. Дугъу къайд гъапIганси, къанундин къайда уьбхюрайи эскрар гьарган жавабдарвалин ляхнин улихь хьа. МВД-йин гъурулушдиъ Урусатдин 16 Игит айивали гьаму читин вахтна му гъуллугъну фициб рякъ ккадапIнуш, субут апIура. Гьяйифки, дурарикан 13 гъарашугъ уьмриан гъушну. Идарайин кIулиъ айири жигьил полицейскийириз ляхин апIбан ва уьмур хъапIбан тажрубайикан ктибтурайи ветеранариз ва гьацира полицейскйирин хизанариз чухсагъул мялум гъапIнийи.
Чан терефнаан Сергей Меликовдира къанундин къайда уьбхюрайи гъуллугъчйир пишекарвалин машкврихъди тебрик гъапIнийи. «Гъазанмиш дапIнайи хъуркьувалариин дийигъну гъузну ккундар, ухьу ихь уткан регион артмиш дапIну ккунду. АйтIан ляхнарин гъуллугъчйир гьарганси гьамусра ляхнин улихь хьа. Коронавирусдин тIягъюн мялум гъапIхъан тина инсанар цIийи завалихьан уьрхюра. Коронавирусдин инфекцияйиз аьксивал улупбан серенжемариъ иштирак шулайи полицияйин 2 агъзуртIан артухъ гъуллугъчйир гьюрматнан грамотйириинди лишанлу дапIна. Фицики полицияйин гъуллугъчйир, варитIан хатIа айи йишвариъ уьзур тарабгъувал ярхла апIури, духтрарихъди сабси дийигъна», – гъапнийи региондин кIулиъ айири.
Серенжемдин аьхириъ айтIан ляхнарин гъуллугънан тафавутлу гъахьи гъуллугъчйириз медалар, гьюрматнан грамотйир, республикайин Главайин ччвурнахъан вуйи сяътар ва гьюрматнан кагъзар тувнийи.
Дагъустандин полицияйин гъуллугъчйирин арайиъ Табасарандин баркаллу баярра гизаф а. «Табасарандин нурар» газатдин редакцияйин коллективди, къанундин къайдайин гъаравлиъ айи МВД-йин вари гъуллугъчйир чпин пишекарвалин йигъахъди тебрик апIури, дурариз жандин мюгькам сагъ’вал, дюн’яйиъ ислягьвал хьувал, хизандиъ хушбахтвал ккун апIура.
