Гьаму йигъари РД-йин Главайин вазифйир тамам апIурайи Сергей Меликовди республикайин спортдин циркил артмиш хьпан аьгьвалат фициб къайдайиъ аш ахтармиш гъапIну.

Думу Каспий гьюлихъ ерлешмиш дубхьнайи, спортдин сборный командйир гьязур апIурайи региондин центриз, «Динамо» ва Е. Исинбаевайин ччвурнахъ хъайи стадионариз, спортдин гизаф ляхнариз ярамиш шлу комплексдин дахилнаъ айи, Аьли Аьлиевдин ччвурнахъ хъайи спортдин заан устадвалин мектебдиз гъушну ва му спортдин объектарин ляхнихъди таниш гъахьну.

Хъасин С. Меликов РД-йин спортдинна физический культурайин Министерствойиъ республикайин спортдин цирклиъ заан хъуркьувалар гъадагъу спортсменарихъди, машгьур тренерарихъди гюрюшмиш гъахьну. Спортдин тикилишарин аьгьвалат ахтармиш апIбакан чан фикрар ачухъ апIури, С. Меликовди кIулди Дагъустандиъ спортдин инфраструктурайин артмиш’валикан учв разиди айивал къайд гъапIну. «Урусатдин хайлин регионарихьан Дагъустандиъ айидарстар мумкинвалариинди дамагъ апIуз шуладар… Хайлин харижи уьлкйириъ спорт – гьюкуматдин политикайин асас пай ву, ва думу цирклиз аьхю кюмек жара апIура. Ухьура кьяляхъ гъузрадархьа. Заан хъуркьуваларин спортдихъди сабси, махлукьатлу спортдизра фикир тувну ккунду. Мидланра гъайри, ухьу инвестицйир ва инсанар республикайиз жалб апIбакан улхурахьа. Ав, туризм – ужуб ляхин ву, хъа спортдизра фикир тувну, му цирклиз меценатариз теклиф дапIну ккунду», – гъапну региондин кIулиъ айири.