Гъябгъюрайи йисан эвелариан вари дюн’яйин жямяаьтлугъдик гъалабулугъвал кипнайи коронавирусдин уьзур хъанара яркьуди тарарабгъбаз аькси серенжемар тешкил апIбан бадали, вахтназ вуди Дагъустандин Главайин вазифйир тамам апIурайи Сергей Меликовди чан указдиинди яшайишдиъ хъанара саб жерге дигиш’валар тIаъна.
Улупнайи указдиз асас вуди, агьалйир транспортдиъ, туканариъ, идарйириъ ва жара жямяаьтлугъ йишвариъ медицинайин маскйир алахьуз буржлу ву. Амма, гьякьикьатди субут апIурайиганси, йишвариин агьалйири я му уьзур, я улупнайи тIалабар ибак апIурадар, маскйирра инсанари чпин хушнииндитIан алахьурадар.
Мициб аьгьвалатнаъ йишвариин къанундин къайда ва жямяаьтлугъ хатIасузвал уьбхбан гъаравлиъ айи полицияйин вакилариз имбубсана артухъ гъайгъушнар шула. Къайд апIурза, шагьрариъси дарди, гъулариъ му жигьатнаан ляхин гъабхувал лапра гъагъиди алабхъура: агьалйир тIалабар уьрхюз гьялак шуладар, хъа полицияйин гъуллугъчйири жямяаьтлугъ къайда уьбхбаъ гъалатIар деетбан гьякьнаан уьлчмйир кьабул апIурайиганра, наразивалар улупура. Фукьан улхбар гъахьишра, ухькан гьарсари жямяаьтлугъ хатIасузвал уьбхбаъ жавабдарвал гьисс апIбан чарасузвал а.
Хив райондиъ айи ОМВД-йин полицияйин начальникдин вазифйир тамам апIурайи Рамазан Селимхановди къайд апIурайиганси, апрелин эвелариан мина полицияйин вакилари, коронавирусдихьан хатIасузвал уьбхбан къайдйирна тIалабар чIур апIбан дюшюшар мялум дапIну, улупнайи вахтназ 438 касдилан административ протоколар дидикIна.
Уьзур ихь арайиъ «либцура»…
– Уьзур ачмиш гъабхьи вахтарихь тевиш, гъи агьалйир дидин хайлин гъавриъ духьна. Гизаф агьалйир уч шлу йишвариъ, жюрбежюр мяракйириъ ихтиятвал уьбхюзра чалишмиш шула.
Арайиз дуфнайи аьгьвалатнаъ жвуван ва жвуван багахьлуйирин сагъламвал уьбхювал гизафси гьарсар касдикан чакан асиллу шула. Жвуван сагъламвал мюгькамуб ву дупну, вижнасузвал улупуз хай шулдар. Гъулариъ хизандиъ яшлу касар адру хал тек-бирра адар, хъа му уьзрихьан думу гъатариз аьхю хатIа а.
Мялум вуйиганси, коронавирусдин инфекция аьзарлу инсандикан сагъу инсандикна багахь аьлакьйирилан, аьзар-луйи багахь инчйир ясана уьгьйир апIбалан кубчIвру. Уьгьйир апIбан натижайиъ коронавирусдиан аьзарлуйин ушвниан утIурччву ширшнан литIнар багахь хьайи жара инсанарира хилар кучру йишварик, алатарик куркIру. Гьаддиз мушваъ медицинайин маскйир алахьувалин чарасузвал а.
Гизаф инсанар айи вахтна жямяаьтлугъ транспортдиъ эувал, жюрбежюр жямяаьтлугъ йишварихьна, туканариз ва гьацира халкьар гизафди уч шлу жара йишвариз гъягъювал шлубкьан кам дапIну ккунду.
Машар-хилар кми-кмиди жикIбан, марццишин уьбхбан чарасузваликан, йиз фикриан, пубра лазим шуладар.
Коронавирус уьзриз аькси серенжемар тешкил апIури, улупнайи вахтназ Хив ЦРБ-йиъ 4046 касдин ахтармишар духна. Гьадму гьисабнаан, COVID-19-диан аьзарлу гъахьи 207 касдикан 180 тамамвалиинди сагъ гъахьну. Имбудари гьелелиг сагъламвал мюгькам апIури ими. Аьзарлуйириз лазим вуйи кюмек апIбан бадали, ЦРБ-йиъ ляхник кайи госпиталиъ гьамусяаьт 8 касди сагъламвал мюгькам апIура, – субут гъапIну Хив ЦРБ-йин кIулин духтрин заместитель Наида Пашаевайи.
