Багъри ругарихьан, абйир-бабарихьан ярхла ади, Урусатдин шагьрариъ пише гъадабгъурайи вая жюрбежюр цирклариъ лихурайи жигьиларин заан хъуркьуваларикан, ужудар ляхнарикан, гьунарарикан ебхьруган, багахьлуйириси, думу миллетдин саки вари вакиларира дамагълувал гьисс апIуру.
Табасаран машгьур апIурайи дирбаш баяр ухьуз хайлин ахьуз. Дурарин арайиъ Санкт-Петербургдиъ айи Урусатдин МЧС-дин университетдин инженервалинна техникайин факультетдин 5-пи курснан студент, айтIан гъуллугънан бицIинур лейтенант Ислам Къурбановра ва гьадму университетдин экономикайинна ихтиярар уьрхбан факультетдин студент Рамазан Атлухановра а. Му баяр кьюридра университетдин дамагъси гьисаб дапIна. Исламди цIа кабхъбан дюшюшдиъ инсан аьжалихьан гъюрхну, хъа Рамазан, университетдин тереф уьбхюри, спортдин талитариъ иштирак шула.
Ислам Къурбановдин абйир-бабар Табасаран райондин Пилигъ гъул’ан Дербент шагьриз кючмиш гъахьидар ву. Мектебдизра думу Дербентдиъ гъушну.
«Узу мектебдиъ 11-пи классдиъ урхурайган, цIа кабхъбан хатIалувалихьан уьрхру дестейин вакилари фици инсанар аьжалихьан азад апIураш, передачайиз гъилигнийза. Йиз гележегдин пише ктабгъувализ иллагьки гьадму передачайи аьхю тясир гъапIну»,
– ктибтура ич сюгьбатнан эвелиъ Исламди.
Хабарсуз дюшюш
Гъубшу йисан 7-пи ноябриъ Ислам чан дуст баярихъди хулаъ айи. Хябяхъган сяаьт 9-диз 15 дакьикьа ккимиди, дурариз гъунши хуларин садар улдариан кIару кум удубчIвури рябкъюру. Ислам баярихъди цIа кабхънайи йишвахьна гъажаргънийи. Подъезддин раккнар хъяркьнайи. Сифте подъезддин, хъасин цIа кабхънайи хулан ракк-нар дюргъну, баяр хулазди учIвру.
«Хал кумру абцIнайи. Нефес хътабгъуз гъагъиди вуйи. Учу, гъуншйирин раккнарик кучри, дурариз цIа кабхънайиваликан хабар туври, дурари гьапIну ккундуш гъаврикк ккаъри гъахьунча. Санур гъуншдихьан кьяши дапIнайи дастамал гъадабгъну, думу хъюхъяриин иливну, хъанара гьадму цIа кабхънайи хулаъ учIвунча. Душваъ кухняйин гьацIкьялаъ, гъах духьну, сар жви дугъужвнайи. Думу, гучI дубхьну, чав-чаин алдайи. ВуйиштIан, дугъу кабхьнайи газран пичран гъвалахъ ацетондихьди хилар гъижикIну. Гьадмуган цIа кабхъбан дюшюш арайиз гъафну. Учу цIа кабхъбан хатIалувалихьан уьрхру ва медицинайин тяди кюмек тувру гъуллугъарин вакилариз дих гъапIнийча»,
– ктибтура Исламди.
МЧС-дин вакилар хъуркьайиз, Исламди ва дугъахъди хъайи баяри цIа ктIубшвну ва цIа кабхъбаан зийнар духьнайи касдиз медицинайин сабпи кюмекра гъапIну. Му дюшюшдиъ гьунар улупбаз лигну, Ислам ва дугъан дустар университетдин ва МЧС-дин терефнаан лишанлу гъапIну. Гьамусяаьт Исламди ужудар аьгъювалар ади хьубпи курснаъ урхура.
Вафалувал
«Университетдиъ аьгъювалар гъадагъурайи хьуд йисандин арайиъ учуз медицинайин цирклиан, инсан хатIа-балайихьан уьрхру къайдйирикан хайлин аьгъювалар тувра. Узухъди урхурайидарин арайиъ, му пише гьаз ктабгънийкIан, кIурударра алахьуру. Хъа му пише дициб фикир айи касдинуб дар. Узу дурариз дидкан ачухъди машнаъ кIураза. Дишди гъапиш, узу гьаму пишейин вакил духьну йиз дадайизра ккундайи, фицики дугъу му лап хатIалу кеспси гьисаб апIура. Гьаци хьузра ву. Узу дугъан гъавриъ аза ва дугъаз гьамци пуз ккундузуз: «Фикир мапIан, йиз масан дада, закур уьмур фициб шулуш, ялгъуз сар АллагьдизтIан аьгъдар. Уву узуз инсанариз гьюрмат апIуз, ватандиз вафалур хьуз, бицIидариз ватанпервервалин тербия тувуз улупунва. Узуз гъи яв насигьятари кюмек апIуразуз. Гьарсар инсанди саб фициб-вушра уж’вал гъибтну ккунду, кIуйва. Узуз узу гьаму пишейиъ рякъюразуз. Дерд-хажалатнаъ, читин аьгьвалатнаъ, гъагъи дюшюшариъ ахъу инсанариз вахтниинди кюмекназ хъуркьубтIан ужуб ляхин хьуб мумкин дар. ЦIин бацаригъян веледар гъючIюргъну, дурар бабан хабаз тувруган, думу бабан улариъ айи шадвалихъ, хал-хизан цIихьан уьбхювализ дидин эйсийи, чухсагъул кIури, разиди гьачIабккру хилихъ саб- ра тевуз шулдар. Хъугъ, дада, узу му пишейиз лайикьлур хьуз ва, варидари баркаллагь кIуруси, шлубкьан вафалуди лихуз чалишмиш хьидиза».
Ав, гьацир ву Ислам – ачухъ, марцци юкIв айир, сабдихьанра гудручIрур, жарадариз кюмекназ хъуркьуз гьязур вуйи табасаран бай. Ухьуз дугъан гьунарарикан гележегдиъра ебхьрувалиин умудлу вуза.
МЧС ва спорт
Ислам Къурбановдихъди сатIиди ич гюрюшдиз Рамазан Атлухановра дуфнайи. Рамазанди ктибтиганси, МЧС-дин гъуллугъназ гъягъюз дугъаз адашди теклиф гъапIнийи. Дугъан пише суддин экспертизйир апIбахъди аьлакьалуб ву.
«Яна, цIа кабхъувалин дюшюш хьпан кьяляхъ, экспертари, йишв’ина душну, думу хатIалувал фу себебариан арайиз гъафиб вуш ашкар апIбан ахтармишар гъахуру. Узуз, дишди гъапиш, документарихъди ляхин апIуз ккуниб дарзуз. Узу университетдиъ документар Ислам урхурайи факультетдиз тувнийза. Хъа гьаз-вуш экономика-йинна ихтиярар уьрхбан факультетдиз кьабул гъапIунзу. Узузра гележегдиъ цIа кабхъбан дюшюшар арайиз дуфнайи йишвариина гъягъюз, инсанариз кюмек апIуз, дурарин хал-йишв, мутму уьбхбаъ кюмекчи хьуз ккундузуз»,
– кIура Рамазанди.
Рамазан спортдиин машгъул ву. Думу спортдин юкьяр дисбан жюрейиан сифте райондин, хъасин районарин арайиъ вуйи ва республикайин дережайин, хъа гьамус, университетдин тереф уьбхюри, жюрбежюр талитариъ иштирак шула. Дарсариъ хъуркьувалар улупуз спортди дугъаз саб манигъ’валра апIурадар.
«ЦIа ктIубшвру гъуллугъчи, гуж кайи, кьувватлу касси, теорияйин аьгъювалар ва цIихъди женг гъабхуз ужуб тажруба айир ва техника аьгъюр духьну ккунду. Фицики, ачухъ майдандиъ ва хъябкьнайи хулаъ цIа тарабгъбан дюшюшар ахтармиш апIури гъахьиш, му аьхю илим ву. Амма цIа ктIубшвбан дюшюшариъ ишлетмиш апIру умбрариан гьялакди гъягъюз, противогаз ишлетмиш апIуз, гъати кумрягъ лицуз удукьрувалихъди сабси, цIа ктIубшвру гъуллугъчи дирбашур ва дурумлур, жюрбежюр хатIалу дюшюшариъ ахъу инсанариз, жвуван жан гьяйиф дарапIди, гьадмусяаьт кюмекназ хъуркьуз гьязур вуйир духьну ккунду. Эгер кIваъ гьаму фикрар адарш, му пише ктабгъувал дюз дар»,
– гъапну Рамазанди.
Узу ихь баярин гафарихъ дикъатлуди хъпехънийза. Ихь жигьил ватанагьлийири мялум дару касарин уьмур бадали чпин жан тувуз гьязур вуйиваликан, чпин гележегдин пишейиин рази вуйиваликан, МЧС-дин вакилари цIихьан гъюрхю машгьур хуларихьан, душвариан сагъди адагъу инсанарикан, утканвал кади ктибтурайи. Дурарихъ хъпехъурайи узу сабдин гъавриъ гъахьунза: му баяриз чпин уьмрин рякъ гъибихъну.
