17-пи ноябрь – вари халкьарин студентарин Йигъ ву. Му йигъан гъаншариъ узу Дербент шагьриъ ерлешмиш дубхьнайи, Сейфуллагь-кьади Башларовдин ччвурнахъ хъайи медучилищейин студентарихъди гаф-чIал гъапIунза.
Амина Аскендерова Табасаран райондин ТIаттил гъул’ан ву.
«Учу юкьур чи вуча. Аьхюну чйири варидари духтирвалин пише ктабгъну, ва дурари, духтирвал сабабнан ва ужуб ляхин ву кIури, кми-кмиди кIури шуйи. Дурарин насигьятнахъ хъебехъну, духтирвалин пише ктабгъбиин гьамус фукьан вушра рази вуза. Медучилищейиъ урхури, кьюд йис вуйиз. УрчIвубпи класс ккудубкIну гъафириз, сабпи курснаъ урхурайи вахтна, цIийи мялимарихъди ва курснаъ урхурайидарихъди ужуди таниш хьайиз, читинвалар алахьунзуз. Мялимар учухьна аьхю гьюрматниинди янашмиш шулу. Учу аьхюну пайси больницайиъ аьзарлуйирихъди шулча. Лизи халат али инсанар йиз фикрариъ гьарган гьюрмат айидар вуйи. Сар касдин уьмур ярхи апIувал ва иццурайи касдиз лигувал, думу сагъ апIувал варитIан уж’вал айи ляхнарикан ву»,
– гъапнийи дугъу.
Аминайихьан Урусатдин шагьрариъ айи медучилищйириз урхуз дурушбан себеб фу вушра гьерхнийза.
«Аьгъювалар гъадагъуз ва ляхин дубгъуз ккуни инсандиз гьамушваъра лазим вуйи вари мумкинвалар а. Ич медучилищейиъ ужудар пишекар духт-рар, аьлимар, мялимар лихура. Дурарихьан му цирклиан лайикьлу пишекрар гьязур апIуз шулу. Тмуну терефнаан гъилигиш, Дербент дюн’яйиъ варитIан кюгьне шагьурси гьисаб апIура ва мушван тарихра аьхю мяна айиб ву. Узу мушваъ урхурайивалиин гизаф рази вуза»,
– къайд гъапIнийи йиз сюгьбатчи шуру.
Динара Аьлиханова ва Альбина Мягьямедова медучилищейин 2-пи курснаъ урхурайи студент шубар ву. Дурари студентвалин уьмрикан чпин фикрарра ачухъ гъапIнийи.
«Медицинайин образование гъадабгъру идарйириъ урхуз гьарган читинди ву. Сабкьан гъидидипри, вари дарсариз гъягъюри ва гьар йигъан цIийи уьзрарикан, дармнарикан аьгъювалар гъадагъури ккунду. Шагьриз удучIвну лицуз ва азадди йигъар адауз мумкинвал ва вахт адарчуз. Учу гьарган дарсариин машгъул духьну шулача, гьаз гъапиш пишейи аьхю жавабдарвал тIалаб апIура. Увухьна аьзарлу инсан гъахиган, думу сагъ дапIну ккунду. Студент вахтари марцци зегьмет дизигну, яв гележегдин ляхин гъудубгъиган, аьзарлуйиз ерийин кюмек тувузра хьибди. Вахтар ва инсанар дигиш духьна, кми-кмиди жюрбежюр чIуру гьядисйир улукьури шулу. Хъа дициб вахтназ учу гьарган гьязурди ади ккунду. Ич йигъандин график гьамциб ву: больница – дарсар. Гьаци вушра, учу мушваъ урхбиин гизаф рази вуча, гьаз гъапиш гьюкуматдин читин йигъаз, аьзарлуйириз лазим вуйи касар вуча»,
– мялум гъапIнийи дурари.
Шиклиъ: гагвлахъан арчлахъинди: А. Мягьямедова, Д.Аьлиханова ва А.Аскендерова
