12-пи ноябриъ Табасаран райондин Хючна гъулаъ айи сабпи нумрайин лицейиъ «Терроризмдин идеологияйиз аьксивал улупбаъ ватанпервервалин тербияйи уйнамиш апIурайи роль» темайиан республикайин дережайин терроризмдиз аькси семинар-совещание кIули гъубшну.
Думу серенжемдин тешкилатчйир Дагъустан Республикайин образованиейин ва илимдин министерство, дявдинна ватанпервервалин тербия тувру ва урхурайидар армияйин жергйириз гьязур апIру РД-йин региондин центр ва Табасаран райондин образованиейин управление вуйи.
Семинар тешкил апIбан асас себеб – терроризмдиз аьксивал улупбан файдалу гъурулуш дюзмиш апIувал, мектебариъ урхурайидариз ватандаш’валинна ватанпервервалин тербия тувруган, террориствалин фикрарин профилактика апIуз гъулай шартIар яратмиш апIувал вуйи.
Семинариъ Табасаран райондин глава Мягьямед Къурбановди, дугъан заместитель Заур Мусаевди, образованиейин управлениейин кIулиъ айи Аьбдусалам Гьясановди, райондин образованиейин управлениейин гъуллугъчйири ва кьибла Дагъустандин 14 райондин образованиейин цирклин вакилари иштирак’вал гъапIнийи.
Мектебдиъ урхурайидари сягьнйир улупбан ва шиърар урхбан кьяляхъ, серенжем Дагъустан Республикайин мялимарин ассоциацияйин президент, Дагъустан Республикайин образованиейин центрин директор Анжела Байрамбеговайи ачмиш гъапIнийи. Дугъу чан улхбаъ образованиейин тешкилатари жигьилар гъюзимбу уьмрихьна гьязур апIбаъ фициб зегьмет дизигну ккундуш, ктибтнийи. «Гъи образованиейин идарйириин аргъаж шулайи наслиз аькьвлинна эдеблувалин ва ватанпервервалин тербия тувбаан аьхю жавабдарвал иливна. Урхурайидарин ватанпервервалин гьиссар ачухъ апIбан бадали, мектебдиъ тербия тувбан ляхин дюзди тешкил дапIну ккунду. Урхурайирикан инсанар ктауз мектебдин яш варитIан ужуб вахт ву», – гъапну дугъу.
«Мектебдиъ урхурайидариз ватанпервервалин тербия тувувал – гъийин мектебдин асас вазифйирикан саб ву. Гьамусдин бицIидари, интернетдиъ, социалин сетариъ учIвну, вари хабрар агура, амма дурарихьан ужубна харжиб жара апIуз шуладар. Гьаму терефнаан мектебди гъабхурайи ляхниъ аьхю мяна а, душваъ тербия тувбан ляхин терроризмдин ва экстремизмдин профилактика апIуз диш дапIну ккунду»,
– къайд гъапIнийи чан улхбаъ Табасаран райондин глава Мягьямед Къурбановди.
Семинар-совещаниейиъ гьацира РД-йин физичес-кий культурайин ва спортдин министерствойин вакил Халитбег Махачев, ДГУНХ-дин мялим, терроризмдин ва экстремизмдин месэлйириз аьксивал улупбан илимдинна практикайин лабораторияйин кIулиъ айи Гьябиб Мягьямедов, Табасаран райондин администрацияйин АТК-йин аппаратдин гъуллугъчи Надир Зулфикьаров терроризмдинна экстремизмдин идеологияйиз аьксивал улупбаан докладар хьади удучIвну гъулхнийи.
Пленарный заседаниейин кьяляхъ, 5 секцияйиъ терроризмдин идеологияйиз аьксивал улупбан, райондин уьмуми образование тувру идарйириъ урхурайидарин ватанпервервалин ва ватан ккун апIувалин гьиссар тербияламиш апIбан темйириан тренингар ва мастер-классар кIули гъушнийи.
Хъасин серенжемдин натижйир гъивнийи. Семинарин иштиракчйири кIули гъубшу серенжемдин гьякьнаан чпин хиялар-фикрарикан ктибтнийи. Дурари гьамциб серенжем тешкил апIбаз ва думу лап ужуди албагну кIули гъабхбаз Табасаран райондин глава М.Къурбановдиз ва Хючнаарин сабпи нумрайин лицейин директор Жейран Къулиевайиз чухсагъул мялум гъапIнийи.
