Ноябрин 16-пи йигъан Урусатдин Президент Владимир Путиндин табшуругъниинди Дагъустандиъ региондин идара апIбан Центр (ЦУР) ачмиш гъапIну. Къайд апIувал лазим вуки, ЦУР-ар уьлкейин вари регионариъ ачмиш апIиди.

 

Вахтназ вуди Дагъустандин Главайин вазифйир тамам апIурайи Сергей Меликов ЦУР ерлешмиш дапIнайи йишваз гъушну, центрин ляхнин асас метлебарихъди таниш гъахьну.

ЦУР-дин улихь дийигънайи месэлйирикан асасуб – аьдати каналариан, социалин сетариан гьюкуматдин жюрбежюр идарйириз агьалйирихьан гъюрайи аьрзйирин ва илтIикIбарин, гьацира РФ-дин аьтрафариин ляхин апIурайи гьюкминна ватандашарин арайиъ айи аьлакьайин анализ апIувал ву.

Думу жюрейин майданди региондин гьюкмин ва агьалйирин арайиъ аьлакьа тямин апIиди. Дидин кюмекниинди гьарсаб цирклиъ ва гьарсаб аьтрафдиъ айи месэлйирин шикил ачухъди рябкъиди. Гьаддиинди гьюкмин органарин, чпиз айи ихтиярариз дилигну, думу месэлйир гьял апIбан мянфяаьтлувал за хьибди.

Гьаму жюрейин центрар СКФО-йин жара регионариъра тешкил дапIна.