Улихьна йигъари «Хив район» муниципалин образованиейин глава Ярмет Ярметов кIулиъ айи десте Асккан Яракк гъулаз дуфну, ерли администрацияйин ляхнихъди таниш гъабхьну. Гьаддихъди сабси, дурари Асккан Ярккарин мектебдин ляхинра ахтармиш гъапIну. Дуфнайи хяларин арайиъ райондин образованиейин отделин начальник Назаряли Тарланов ва дугъан заместитель Азадин Юсуфов айи.

 

Хярар сифте мектебдиъ урхурайидариз хураг гьивру блокдиз гъушнийи ва ккергъбан классариъ урхурайи бицIидариз мани хураг гьивбан шартIарихъди таниш гъахьнийи.

Асккан Ярккарин мектебдин директор Марат Аьзизовди хялариз мектебдиъ итIру сурсатар уьрхюрайи йишв улупну, дурар марццишин уьбхбан къайдйирихъди таниш гъапIну.

Ярмет Ярметов гьаму йисан сентябрин аьхириъ мектебдиъ ачмиш гъапIу, цифрайин ва гуманитарный жюрейин «Точка роста» образованиейин центрин ляхнихъдира таниш гъахьну. КIваина хурача, центр федералин «Деврин мектеб» кIуру программайин дахилнаъди ачмиш гъапIуб ву. Думу деврин тIалабариз гъилигу техникайихъди тямин дапIна, центриъ уьмуми образованиейин улихь дийигънайи ва аьлава программйир уьмриз кечирмиш апIуз вари мумкинвалар а.

««Точка роста» центрин ляхни мектебдиъ урхурайидариз заан ери айи образование тувбан мумкинвалар артухъ апIура, бицIидарин деврин тIалабариз гъилигу аьгъювалар яркьу апIуз кюмек тувра.

«Точка роста» центрар мектебариъ ачмиш апIували райондин образованиейин гъурулушдиъ образованиейин цIийи къайдйир тIауз ужуб мумкинвал тувди», – гъапнийи райондин главайи.

Гьацира дуфнайидари мектебдиъ мялимари ва урхурайидари марццишин уьбхбан къайдйир тамам апIураш, мектебдиъ учIврударин бедендин температура ебцураш, ахтармиш гъапIнийи.

«Гъи, вари дюн’я COVID-19-дихъди женгназ гъудужвнайи вахтна, мектебариъ урхурайидарин хатIасузвал уьбхювал, марццишнан шартIар тямин апIувал чарасуз лазим ву», – къайд гъапIну Ярмет Ярметовди.

Ахтармишар духну ккудукIбан кьяляхъ, Хив райондин глава мектебдин коллективдихъди гюрюшмиш гъахьну. Мялимарихъди гъабхьи сюгьбатнаъ образованиейин идарайин учIру месэлйир гьял гъапIнийи.